KUGQUGQUZELWE UBUMBANO KWAQHAKANJISWA NOBUHLE BOMHLATHUZE
BEKUBUTHENE izinhlanga ezahlukene emcimbini obizwa ngeSizzle City Food and Wine Tasting, ezululand Yatch Club, kumasipala umhlathuze ngomgqibelo odlule.
Inhloso yawo lo mcimbi obuhlelwe yilinzwa Trading, bekuwukwakha ubumbano ngokuhlanganisa abantu bezinhlanga ezahlukene, bathokoze ndawonye ikakhulukazi njengoba kuyisikhathi samaholide kazibandlela (December).
Ngale kwamawayini abephuzwa, bekudliwa nezibiliboco ezihlanganisa nenyama yezinyamazane. Umqondisi welinzwa, unkz Lindiwe Dube, uthi bahlose ukukhombisa izivakashi ezizohambela emhlathuze ukuzochitha amaholide khona ukuthi sebekulungele ukubemukela ngezandla ezimhlophe, ezifudumele.
“Miningi imicimbi yokujabulela amaholide esiqalile kodwa thina esikuqhakambisayo wubuhle bendawo esiyakhele.
"Ukuhanjelwa kwalo mcimbi yizinhlaka ezahlukene kusijabulise kakhulu ngoba kukhombisa khona ukuzwana ikakhulukazi ngalesi sikhathi sokuhlangana kwemindeni nabangani, kuthokozelwe amaholide,” kuchaza ulindiwe.
Ngale kwezidlo bekuthokozelwa nomculo kabongi Dube osanda kubuya ngamawala emculweni, okamjovo Wabantwana, okanaledi Brown nomdanso kacthe-k ongumdansi osemncane.
Kuphindwe kwantwezwa nangesikebhe. Phakathi kwezihambeli bekunezikhulu zikamasipala umhlathuze, ezomnyango wezokuvakasha ziholwa ngusimphiwe Marojane, ezomnyango wezemidlalo nobuciko ziholwa ngunonhlanhla Ndlela nezinye.
Okhulumela izululand Yatch Club, ujackie Smit, uthe bekungokokuqala behlela lolu hlobo lomcimbi, bezojabula nezikhulu zasemhlathuze, nabafisa kuphinde kwenzeke nangonyaka ozayo njengoba uhlelwa minyaka yonke.
Okhulumela abebehambele umcimbi, udr 3 Second, uthe bayafisa ukhule lo mcimbi njengoba ukhuthaza uzwano nobumbano ezinhlangeni ezahlukene nokuyisifiso esikhulu sikabayede ngesizwe sakhe.
Abe-be Byloading Food yibona abashiye izethameli zincinda iminwe ngenxa yobumnandi bokudla. zowakha@ilanganews.co.za