ZIYABUYA KWINDAYI HOMECOMING FESTIVAL
SEZIHUBELA sakusha ngomunye wemicimbi yobumandi emikhulukazi ebhekwe ngabomvu KwazuluNatal, Indayi Homecoming Festival, ozokuba mhla zingama-23 kuyo le nyanga, Kwanombika Sports Ground, endwedwe.
Lo mcimbi ILANGA elingabaxhasi bawo abantu bazothokoziswa ngamaciko anohlonze futhi asezingeni eliphezulu, phakathi kwawo okubalwa kuwo ODJ bodumo kanye nabaculi bezinhlobo ezahlukene zomculo.
Ohlwini lwabaculi abazonandisa kudidiyelwe abegqomu lodumo nabakamaskandi abangaconsi phansi kubalandeli babo.
Lo mcimbi uthathwa njengeminye yemicimbi ekahle kakhulu futhi ehambisana ngqo nalesi sikhathi sonyaka sokungcebeleka nokuzipholela, uthokozele amaholidi kazibandlela, futhi uchithe isikhathi nabangani nabathandiweyo bakho.
Sekungokwesibili wenziwa lo mcimbi kanti umnu Hlangu Msomi, oyisikhulu sendayi Communications, ehlela lo mcimbi uthi uzoqhubeka wenziwe minyaka yonke.
Okuhle ngawo wukuthi awuh- lelelwe nje kuphela abantu basendwedwe nasethekwini, kodwa wumcimbi wabantu bonke, ngisho laba abaqhamuka kwezinye izifundazwe abathanda ubumnandi nokuzithokozisa ngokuchitha isikhathi esimnandi nabanye abantu.
Ukhozi FM luzobe lusakaza bukhoma kulo mcimbi. Ngesonto eledlule umnu Msomi, uthembise ukuthi zonke izinhlelo zimi ngomumo manje, wathi abantu bazobhema bakholwe.
Utshele leli phephandaba ukuthi ufihle induku ngabaculi abathile abashisa izikhotha abazomenyezelwa ngaphambi kancane nje komcimbi.
Uqhube wathi abantu mabenze isiqiniseko sokuthi bathenga amathikithi ngokushesha angaze aphele njengoba ehamba ubuthaphuthaphi ema-computicket, nasezitolo zakwacheckers nakwaUsave.
Amathikithi ajwayelekile abiza u-r150, kuthi awezicukuthwane abize u-r500. Abanye babaxhasi wukhozi FM, The Glenlivet, Jameson, Absolut., Enterprise Ilembe neg.h.mumm Champagne.