EZEMISAKAZO:
KUBUKEKA sengathi iziteshi eziningi kulezi ezithathwa njengezethu thina bantu abamnyama esiphila impilo yasedolobheni, zenza kahle, ikakhulukazi ezinhlelweni zasekuseni.
Sengizame ngaze ngancama ukuthola iphutha ohlelweni lukadj Fresh kwimetro FM, olukaJustice Ramohlola kuradio 2000 nakwezinye eziningi - kuvele kungicacele ukuthi iningi lalaba likwazi kahle elikwenzayo.
Kangimangalanga nje kangako ngesonto eledlule ngithunyelelwa isithombe ngumzokoloko weGagasi FM bejabulela ukuthi uhlelo lwabo ekuseni kwigagasi FM selulalelwa ngabantu abafinyelela esigidini.
Nakuba lungenasimanga lolu hlelo kodwa luhlelekile, futhi bezwakala bebambisene ngaphandle kokukhathazana uma sebesemoyeni, yena umholi wohlelo umzokoloko noheazy nonjabs.
Siyabahalalisela kodwa kusamele bafake izithako nje ezizokumangaza, zikukitaze, hhayi ngamancoko nje kuphela kodwa kube nevavavum, hhayi izigatshana ezilindelekile zikhathi zonke.
Le vavavum igcwele mfi kudj Fresh noramohlola. Olunye uhlelo okumele lufakelwe izipopolo ezinkulukazi ngolukabafo laphaya okhozini FM, usipho Mbatha. Ngiluthola lungahlabahlosile lolu hlelo, kuze kusize khona ukuthi ubafo uvele agxile kulokhu okubizwa ngama- basic okusakaza.
Shintshani Mthiya nethimba, ngicabanga ukuthi ninazo zonke izinsiza kusebenza - pho kungani sidla uphuthu nsuku zonke? Masidlule lapho ngokuphuthuma. Njengoba kade ngisekhefini, ngithokozile ngesikhathi sengibuyela ehhovisi. Ngithole inqwaba yemibono ngesikushicilele ngokwedlule kule ngosi. Le mibono ivela kwabasebenza ngemisakazo, abasemazingeni ahlukene. Nansi eminye yayo:
KWELAKHO elihamba phambili ikhasi KWILANGA Langesonto mfokambatha, ngiphikisana nokushoyo uma uthi kuyosisiza ngani ukugxeka labo esingabafuni ezinhlelweni zemisakazo?
Elami lithi kulesi sikhathi esiphila kuso izinkundla zokuxhumana nawo amaphephandaba kunamandla ekufakeni ingcindezi kunoma ngabe yini esinganeme ngayo singabalaleli.
Ngeke sishintshe isiteshi ngenxa kamshengu nje eyedwa okhozini FM. Musa ukusilahlisa ithemba ngoba le nduku sifuna ize izwele kubaphathi bokhozi FM abagweve nomfo kamshengu kusigiya Ngengoma. Ngokwami kalumfanele lolu hlelo, luyamehlula. Bakhona abangenza kangcono kunaye.
Sakhile ekhiphimbazo, Kwamhlabuyalingana.
SAWUBONA, umsakazi ngumsakazi ngomlaleli futhi kuhle ukuba aphinde abeke umbono ngokuthile anganelisekile ngakho (umlaleli) kodwa kubalulekile ukuba ungaveli nje ubeke umbono ungakayiboni inyathuko ukuthi iyaphi.
Ngike ngaphosa amaqaphelo ami embonweni kakhabzela Mzimela. Yize ungacelanga ukwenanelwa embonweni wakho kodwa uyihlabe esikhonkosini mfokamzimela ngabalaleli bokhozi FM.
Kukhona abalaleli abahlale begxeka njalo. Abanye kabafuni ukunika umsakazi othile ithuba kulolo hlelo asuke egixabezwe ngalo ukuba akalushayele.
Kukhona labo abahlale befuna ukuzwakala emoyeni, ikakhulukazi bekhonza. Siyazi ukuthi nisuke nifuna udumo kodwa akumele nilufune ngenkani. Lapho kukhonzwa khona bakhona, lapho kuphawulwa khona bakhona!
Cabanga ukuthi baningi kanjani abalaleli abafisa ukungena emsakazweni? Omunye kade aqala ukulalela umsakazo kodwa ufuna ukulokhu etshelwa njalo ukuthi makacishe umsakazo emva kwakhe.
Angisayiphathi-ke uma kuziwa ekukhonzeni. Bakwethu asikhonzeli kodwa siyakhonza, yisizulu esingaxutshwe nalutho lesi. Kukhona abalalela umsakazo ngoba belinde ukukhonza noma ukuphawula inkwashunkwashu. Kukhona nalaba abahlale begxeka abasakazi ikakhulukazi laba bomculo kamaskandi.
Uyazi ngendlela ethe chithi saka ngayo imisakazo uzomangala, ungayilalela neyomphakathi uma kuwukuthi umsakazi omzwayo akakugculisi. Kukhona abantu abafana nozero3 nabanye ongasoze wabezwa kuzona zonke izinhlelo kodwa njalo uma bephawula bahlale beyihlaba esikhonkosini.
Balaleli bokhozi FM anoke nizifundise ukubheka umsuka nempokophela phambili yento ngaphambi kokuba nigxeke. Make seseke umsakazo futhi sibeke imibono lapho kufanele khona. Kubalulekile nokunika umsakazi ithuba siphinde simkhuthaze uma enzekahle.
Mangibonge, Themba Dlamini, esikoko.
* Singayithokozela kakhulu neyakho imibono ngakho konke okuthinta ezemisakazo kule e-mail engezansi nasezinkundleni zokuxhumana okutholakala kuzo umbhali.
Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za