ES'KHALENI:
SESIFIKILE isikhathi sokuthi umndeni wakwamotaung ongabanikazi bekaizer Chiefs uzinuke amakhwapha ngokwehlelwa yisithunzi ngendlela exakile kwale kilabhu eyigugu kwabaningi eningizimu Afrika.
Abalandeli bechiefs badume kakhulu ngokuthanda ukukloloda uma bekhuluma ngale kilabhu ezakhele olukhulu udumo eminyakeni edlule iwola izinkomishi ezahlukene cishe kuwo wonke amasizini. Muva nje abathandi bayo sebefana nendoda ehlushwa yinkosikazi, esinamahloni okubonakala emphakathini.
Nakuba abaningi besola usteve “Mphathi” Komphela ngokubheda kohlelo kwichiefs kodwa ngokwami umunwe kumele uqondiswe ezikhulwini zayo. Zimqashe zilazi kahle kamhlophe irekhodi lakhe kulo mkhakha.
Kayikho into ethusayo ngokunganqobi lutho kwechiefs kula masizini amabili nesigamu ukomphela eyicija, vele uqashwe kwaziwa kahle ukuthi akayona inkunzi yezicoco.
Kangikholwa ukuthi umuntu obhekene nokusayiniswa kwabadlali kwichiefs angakwazi ukuziphendulela ukuthi wayeboneni kuEnocent Mkhabela, umichelle Katsvairo, ulewis Macha ukukha nje phezulu kubadlali abasayine kabaze benza lutho kule kilabhu.
Ukomphela ufike ichiefs ivele ihlakazekile njengoba ibisanda kuxabana nabadlali abebewumgogodla isacijwa ngustuart Baxter oshiye le kilabhu eyinqobele IMTN8 ne-absa Premiership. Laba badlali ngumandla Masango, utefu Mashamaite no-itumeleng Khune.
Umasango nomashamaite bagcine beshiyile balibhekisa e-europe kanti ukhune ubuye wakhumelana umlotha nezikhulu. Cishe kufane nesibusiso ukungahambi kukakhune ngoba ngokwami nguyena oseyihlenga ekutheni iphenduke inhlekisa yoqobo ebholeni lakuleli. Ngabe iyaphela yisibhaxu ukuba akaphapheme ezintini ngoba iyaboza ensimini.
Ngokwami, ukhune nguyena mdlali okumfanele ngokugcwele ukudlubha ijezi lechiefs enomthwalo wokujabulisa izigidigidi zabalandeli bayo. Ngaphandle kwalo nozinti oyitakula kukubi emidlalweni eminingi, iningi labadlali bale kilabhu liyehluleka ukuyithwala nxa kunzima okukubeka ngokusobala ukuthi lasayina kungafanele.
Ngeke ngithuke uma ababhekene nokukhangiswa kwale kilabhu bethwala kanzima ezingxoxweni nabaxhasi kwazise umkhiqizo abawuphethe sewuphantshe kakhulu.
Kubukeka sesifikile isikhathi sokuba ukaizer “Shintsha Guluva” Motaung ongusihlalo wale kilabhu afingqe imikhono, asebenzise amagalelo nolwazi lwakhe olunzulu lokuphatha le kilabhu ukuzama ukubuyisa udumo lwayo.
Mhlawumbe kungaba yisu elihle ukuba alalele isililo sabalandeli agudluze indodana yakhe, ubobby, ephethe isikhundla esiyinhliziyo kule kilabhu, sokuqasha.
Phela nocecil Motaung ongumfowabo kashintsha Guluva umunwe wawuqondisa kubobby ngokubheda kwechiefs ekhuluma enkonzweni yomngcwabo kamichael “Bizzah” Dlamini nonyaka ethe- kwini.
Kumele ushintsha Guluva athathe izinqumo ezinqala kungakhathaleki ukuthi zishaya nasemndenini wakhe uma efuna ukuvala amehlo isahlonishwa njengaphambilini. zakhelem@ilanganews.co.za