IZIYALO EZIMQOKA ZIKA-RONALDO KUBADLALI
UCRISTIANO “CR7” Ronaldo waseportugal ogijima kwireal Madrid yasespain udalula izimfuno zakhe ngaphambi kokuba abeke amakhokho ethala.
Uronaldo uphinde waqokwa njengomdlali ovelele emhlabeni ngolwesine ebusuku efrance enqoba umklomelo owaziwa ngeBallon d’ Or. Uhlule ulionel Messi webarcelona noneymar weparis Saint-germain.
Uronaldo usenqobe lo mklomelo izikhathi eziyisihlanu. Useyalingana nomessi naye oneziyisihlanu. Uronaldo uthi njengoba egqoka unombolo 7 nje, ufuna ukuwunqoba lo mklomelo izikhathi eziyisi-7.
“Zonke izinto ezimqoka empilweni yami ngifuna zihambe ngasi-7. Ngifuna izingane eziyisi-7 nalo mklomelo ngifuna ukuwunqoba kasi-7. Ngiyazi ukuthi iminyaka yobudala isiyangishaya njengoba nginengama-32 kodwa umzimba wami ngiwuzwa usasesimweni esihle.
“Ngaphandle kwalokho, ngiyazinakekela angenzi noma yikanjani. Umdlandla wokuvuka ngiye ejimini usekhona, ngizizwa nginamandla. Ngisazoqhubeka nokusebenza kanzima ngiyilwele le miklomelo emibili yokuba ngumdlali womhlaba engiyifunayo,” kusho uronaldo.
Ube eseluleka bonke abadlali abagijima esigabeni esiphakeme.
“Ngisho ungaba nekhono elingakanani ebholeni kodwa uma uhlulwa wukuziphatha ngeke uye ndawo. Kunabadlali ababatshaziwe besebancane kodwa baphelela emoyeni ngenxa yokuhlulwa wukuziphatha.
“Nginayo yonke into ongayicabanga emhlabeni ngisho ngingaliyeka ibhola manje imali enginayo ingaphilisa izizukulwane zami eziningi ezizayo.
“Kodwa lokho angifuni kubuse impilo yami ngoba umdlalo webhola ngiyawuhlonipha. Ngifuna ukushiya igama elihle ebholeni, elizokhunjulwa. Uma ungumdlali kufanele ukulwele ukushiya igama elihle ungadumi ngegama elibi ngoba lokho kulimaza ngisho izizukulwane zakho.
“Asisebenzeni ngokuzikhandla siwuhloniphe lo mdlalo ngoba ngaphandle kwawo ngeke sibe yilutho. Cabanga nje uhole itshe lemali ngokuthi uyadlala bese wena uzocekela lokho. Kunabantu abasebenza kanzima bahole kancane kodwa thina siholela ukudlala nje kuphela,” kusho uronaldo.
Uthi akekho umdlali amfanisa naye nomessi njengamanje, wathi wonke umuntu kufanele azakhele elakhe igama angavumi ukufaniswa nabantu abenze lukhulu engakenzi lutho.