Okushaqisayo ngowe-gospel
Uvumile ngesms ukuthi uyasazi isisulu
IKHIHLA isililo ngesihlabani somculo we- gospel intokazi esencane ethi sithathe ubuntombi bayo, sayikhulelisa sase siyiphoqelela ukuba ikhiphe isisu.
Undlovukazi (okungelona igama lakhe langempela) uphinde asole lesi sihlabani ngokuthi ngaphezu kokuyikhulelisa nokuyikhiphisa isisu siphinde sayithelela ngesandulela ngculaza (HIV).
Le ntokazi ithi lo mculi ( ILANGA Langesonto elingeke limdalule ngegama) umhlukumeze ngendlela engachazeki waze wacishe wafa nokufa kanti ngenxa yalokho usemnyanyisa okwamafinyila.
Iqhube yathi lo mculi akasafuni nokuyikhulumisa, baxoxe ngale ndaba yegciwane ngoba vele eyokuthandana kayisekho.
Lesi sihlabani, esisesincane naso ngokweminyaka, sike sahlabana nangezindondo ezibalulekile kwicrown Gospel Music Awards ngowezi-2013, ngowezi-2015 nakuwo lo nyaka esigoduke kuwo nezimbili. Singene emculweni siseyingane.
Kuyimanje sinenqwaba yamaalbhamu nezingoma ezishisa izikhotha. Futhi kasisali emicimbini emikhulu ye- gospel njengoba besikhona nasemizungezweni yecity 2 City ebihlelwa ngusipho Mbatha wokhozi FM kanti le ntokazi ithi bagcine ukubonana ngeso lenyama kwicity 2 City ebiseworkshop, ethekwini, ngomfumfu (October) zingama-27.
Echaza undlovukazi ngokwazana kwabo, uthi kuqale enkundleni yokuxhumana, ufacebook, isikhathi esithi masibe ngunyaka ngaphambi kokuba babonane.
Uthi langalimbe bavumelane ngokuba bahlangane emusgrave, ethekwini, nokuholele kulo lonke lolu talatiya asezithola ekulona.
“Sibe sesiya endlini yakhe, sahlala sibuka ITV, sadla amasnack. Okunye kuholele kokunye kwagcina kwenzeka into engizisola ngayo manje njengoba sigcine silala. Bengiqala ngaye ukulala nomuntu wesilisa futhi kasiyisebenzisanga i- condom.
“Sesiqedile ungibizele i- uber
ngoba ubesazoya kocula. Siqhubekile sajola emuva kwalokho, ngivakashe nase- studio esikuwest Walk (enkabeni yedolobha) abeke asebenzele kuso (esho evezela intatheli i- video ashuthe kuyo lo mculi edlala i- keyboard e- studio).
“Bekunguncwaba (August) zimbili siqala ukulala, saphinda futhi ngomandulo ( September) ziyi6 - nakhona lapho kasikusebenzisanga okokuzivikela.
“Unginike imali yokuthenga amaphilisi ( morning after) ngayinqaba ngathi ngizozithengela. Ngibone ngoba sengeqiwa yizinsuku zokuya esikhathini ukuthi kawasebenzanga, kwacaca ukuthi sengikhulelwe ngomfumfu ( October).
“Ngithe uma ngimazisa wathi kakukho ukwenza ngokunye, kuzomele ngisikhiphe isisu ngoba nale ngane anayo emgungundlovu uyithole ngendlela efanayo, engayihlelele.
“Ngizihlolele kwaze kwaba kathathu ukuthi ngikhulelwe ngempela na. Emuva kwalokho ngimtshelile ukuthi ngidinga imali ukuze ngiqinisekise kahle kudokotela, nangempela wangifakela u-r300 ( ILANGA Langesonto linabo ubufakazi be- ewallet yale mali neveza isiqalo segama nesibongo salesi sihlabani).
“Ube esephoqelela ukuba ngithole indawo engizoyosihushula kuyo isisu. Kwicity 2 City ebiseWorkshop bengihleli nomfowabo nabantu asebenza nabo u... (emgagula ngegama), ngagcina ngihanjiswa wobhuti bami eflethini ebengizolala kulo edolobheni.
“Ngimfonele ngaze ngayeka ezintatha, waze wangifonela yena ekuseni wathi ubematasatasa.
“Uthe uzongibizela i- uber ngihambe ngiye kwenye indawo eku-6th Floor ewest Walk, ngibuze ukuthi yimalini (ukuhushula isisu) ukuze angifakele (leyo mali) bese ngiyasikhipha. Bathe wu-r500 wase engifakela yona ( ILANGA LangeSonto liyibonile ISMS ye- ewallet ka-r700 evela kuye lo mculi ngalolu suku). Banginikeza amaphilisi ( ILANGA Langesonto lilibonile igobolondo lalawa maphilisi amane elibhalwe igama elithi Cytotec athi uwagwinyile undlovukazi).
“Ubesehambile eseseEastern Cape sengiwagwinyile esengigulisa, engihlanzisa. Benginenyanga eyodwa (ngikhulelwe) ngaleso sikhathi. Ngigule ngaze ngangakwazi nokuhamba,” kuchaza undlovukazi.
Uthi lo mculi, obuye abe nolaka olusabisayo, ubefuna ukubuya ukuze amhambise esibhedlela kodwa wathi makayeke ngoba bazoze basole ekhaya kubo (undlovukazi) njengoba ubengabatshelanga ukuthi usenze isimanga esingaka. Ngenxa yokuxineka uthi ugcine esehanjiswa ngabakubo esibhedlela esiphingo, wangabatshela kodwa ukuthi udle lawa maphilisi enzela ukuba angangeni enkingeni kubo.
Emuva kwalokhu uthi uhlolele IHIV njengoba bekufike abedurban Lesbian & Gay Community Health Centre esikhungweni afunda kuso edurban University of Technology (DUT), wathola ukuthi usehiv positive.
“Kangingabazi ukuthi ngithelelwe nguye ngoba bengivele ngiwenza ama- test phambilini, nginegative,” usho kanje.
Leli phephandaba liyibonile imiphumela yangomhla ziyi-14 kumbasa (April) wezi-2014, neyangomhla zingama-25 kunhlolanja (February) ngowezi-2016 ebithinegative, neyangomhla ziyi-18 kuMfumfu (October) 2017 ebisithipositive.
“Okungiphatha kabi kakhulu manje wukuthi akasafuni nokukhuluma nami. Bengifuna ukwazi ukuthi uyasazi yini isimo sakhe sempilo ukuze azibheke noma ngazi ukuthi wangithelela ngamabomu na.
“Ngigcine ngikhuluma naye ocingweni ngomgqibelo siseblue Lagoon kodwa akanganginika thuba. Ubengibuza ukuthi ngitheni kumama u.... (esho umsakazi woKhozi FM), waze waluvala ucingo. Ngifisa abantu bamxwaye ngoba akayona le nto abacabanga ukuthi uyiyo,” kulila undlovukazi.
ILANGA Langesonto lizibonele ezinye zezingxoxo zabo kumakhalekhukhwini wakhe (undlovukazi), lazizwela nenkulumo eqoshiwe lapho lo mculi esola lo wesifazane ngokuthi uyenze ngamabomu le nto yakhe.
Ethintwa yiphephandaba, lo mculi wenqabile ukuphawula wanxusa ukuba kukhulunywe nenkampani ebhekelele izindaba zakhe. Kwehlule noma echazelwa ukuthi ukuziphendulela kuzosiza ngoba lokhu kakuhlangene nomsebenzi wakhe kodwa kungempilo yakhe, wenqaba.
Uvumile kodwa ngesms ukuthi uyamazi lo wesifazane, esho negama lakhe langempela. Kuze kwashaya isikhathi sokushicilela itop Class Productions ingaphendulile kanti naye ubenayo le mibuzo kwiemail yakhe ngqo.
Phakathi kwemibuzo abathunyelelwe yona wukuthi sebeke bahlangana na nale ntokazi ngale kwezingxoxo ezikufacebook? Sebeke baya yini ocansini? Utheni imtshela ukuthi ikhulelwe? Bagcine nini ukuxoxa? Imali abeyithumelela yona bekungeyani?
Nokuthi ngabe uyasazi na isimo sakhe SEHIV?