UPHOXEKILE OFUNA UKUSHINTSHA UBULILI
KUMBHEDELE owesilisa osezinhlelweni zokushintsha ubulili bakhe abe ngowesifazane, obebheke ukudla umhlanganiso, athathe isicoco sokuba ngumr Gay RSA 2017, emcimbini obusecarnival City, egoli, ngesonto eledlule.
Lo zime ogama lakhe ngubradley “Mellisa” Mbambo (32), obeqhudelana nezinye izitabane uthi nakuba ephoxekile ngokungadli umhlanganiso kodwa ngeke aphele amandla futhi uphokophele phambili ukwenyusa igama lekwazuluNatal.
Phambilini ILANGA Langesonto like labhala ngalo zime owakhala wemuka nesicoco sikamiss Transgender & Beauty Pageant 2017 ngenyanga eyedlule. Emncintiswaneni wakamuva ubemele lesi sifundazwe njengoba bekunguyena kuphela osuka Kwazulu-natal.
Ukhala ngokuthi ibizomsiza kakhulu imali ebitholwa ngophume phambili ebiwu-r30 000, ukuze akwazi ukufeza iphupho lakhe lokushintsha ubulili, okuyinto athi izomudla u-r300 000.
Ubradley ongowasentshangwe, entshonalanga, yetheku ubebheke ngabomvu ukudla umhlanganiso. Uthi ngale mali ubezosizakala ekubeni aqale ukuhlinzwa ngohlelo olwaziwa ngokuthi yi-sex Reassignment Surgery, lapho umuntu esuka eshintsha ubulili besilisa esezoba ngowesifazane.
“Benginethemba elikhulu lokuthi ngizobuya naso isicoco kodwa-ke akuhambanga kanjalo. Lokho akuchazi ukuthi sekuphelile ngephupho lami,” kusho yena.
Ubradley uvele adinwe agane unwabu uma umbiza ngendoda, asho ukuluvala ucingo.
Phambilini uke wahlabana ngesicoco sikazime idiva of Note 2017. Umiss Gay RSA wumqhudelwano wezitabane ezingozime odume ngele-lgbt Community Beauty Pegeant, owenziwa njalo ngonyaka.
Emncintiswaneni wakulo nyaka isicoco sihlwithwe nguzsa Zsa osengumiss Gay RSA 2017/18, wahlabana ngo-r30 000.