ZIYAKHALA IZISULU NGOKUHLEHLA KWECALA
SEKUDIDEKE wonke umuntu enkantolo yobugebengu obuhleliwe ethekwini emuva kokuba kuphinde kwahlehla ukugwetshwa kwesibili kukambhishobhi wezimanga, ujabulani Mvubu ( osesithombeni), osekuhlehle izikhawu ezine.
Kulokhu kunyamalale ummeli wakhe omkhulu, u-advocate Sogoyile Nene wasemgungundlovu, okubikwe ukuthi akatholakalanga nakumakhalekhukhwini wakhe ukuze achaze ukuthi ubanjwe yini. Libe selihlehliselwa ulwesibili ziyi-12 kuzibandlela (December).
Phela bekumele aphinde agwetshwe ngeledlule kepha lahlehliselwa ulwesithathu, kuleli sonto yimantshi unkz Christo Mazibuko ngoba ithi selihlehle kaningi.
Lize lihlehliselwe ulwesithathu nje, kuvele kwashona esikhaleni unina womshushisi unkz Hazel Sararamen. Ngaphambilini belike lahlehla kabili ngoba kwathi ngesikhathi egwetshwa kwatholakala ukuthi ugwetshwe ngendlela engacacile, abamajele bathi alibuyele enkantolo.
Akasagwebeki nje umfokamvubu indaba iqale ngokuba izisulu ezimbophile zihlukane phakathi ngemibono, kwaba khona ezihamba naye ezithi akakhokhe imali, ezinye zathi makaye kwalasha. Kuthe esegwetshwa imantshi yamgweba amahora ayizi-7 000 ebhadla ejele kodwa alale khona ngezimpelasonto kuphela, aphinde akhokhele izisulu imali yazo nyanga zonke.
Ufike nayo imali eseyoqala ukuyikhokha wabuyiselwa emuva kwathiwa akalinde ukubuyekezwa kwesigwebo sakhe - akubange kusenzeka njengoba selilokhu lihlehliswa. Kubonakala sengathi isigwebo sokuba ayobhadla ejele siyangabazisa ngoba izisulu seziklelisiwe ukuthi zizoholelwa nini.
Ezinye izisulu ezikhulume ne
LANGA Langesonto bezikhononda ngokuthi kungenzeka ukuthi sekudlalwa imali lapha njengoba kulokhu kuhlehla icala. Kanti abanye bathi umfo kamvubu uyinsizwa eqinile engayi phansi ingandlalelwe.
Akwaziwa ukuthi iyozala nkomoni ngolwesibili njengoba sekuhlale kunezigameko ezimangalisayo kuleli cala.