Bayaveva "ngokuqolwa" ngukwesta izizumbulu
EZOSAZIWAYO: Bathi akasayiphathi eyokuthi uzowubuyisa kanjani ur94 000 abamkhokhele wona
UDINWE uyafa umhleli womcimbi wobumnandi, okhala ngesihlabani somculo we- hip hop, esingalubhadanga emcimbini sesikhokhelwe isizumbulu semali, abantu basala beqhomolozile kwaze kwasa emnyango.
Lo mhleli womcimbi obungempelasonto edlule, ukhala ngalesi sihlabani esidume ngelikakwesta, ogama laso langempela ngusenzo Vilakazi - uthi sephule isivumelwano abebesenzile sokuba sinandise emcimbini ekubeni sesikhokhelwe yonke imali yaso ebesiyibizile ewu-r94 000.
Osekushubise isimo saba muncu wukuthi ukwesta lo kuthiwa akasayingeni eyokubuyisela emuva imali abesekhokhelwe yona njengoba engalubhadanga emcimbini.
Ukwesta ungelinye lamaciko abebhekwe ngabomvu kulo mcimbi obizwa ngenewcastle Summer Fest, obukhona enewcastle, uhlelwe yigoodlyfe Events Solution ngokubambisana nebonoko Trading nem-charlie Entertainment.
ILANGA Langesonto lithole ukuthi indlela isimo esesishube ngayo, udaba seluze lwangenelelwa nangabameli bomhleli womcimbi. Kuthiwa ukwesta akasatholakali nasezingcingweni, kusolakala ukuthi useyabaleka.
Uthembinkosi Mzoneli ongomunye wabahleli balo mcimbi, uthi isithunzi sabo sidicileleke phansi kubantu abebehambele lo mcimbi, asebebasola ngokusebenzisa igama likakwesta ukubadoba ukuba beze emcimbini.
“Akubanga kuhle ukungafiki kwakhe ngoba abantu babemlindele ngabomvu, bekhokhile kodwa yena wavele wangeza futhi wazithulela,” kukhala umzoneli.
Uthi okubuhlungu wukuthi akacacisanga kubalandeli bakhe ukuthi akezi nesizathu sokungezi. Uthi okubahlukumeza kakhulu imali ayifunile phambili ukuze afike kulo mcimbi. “Simkhokhele imali ewu-r94 000, okungeyona imali encane kodwa yena wakhetha ukungawuhloniphi umcimbi wethu,” kuqhuba umzoneli obethukuthele ethelwa ngamanzi.
ILANGA Langesonto linabo ubufakazi bokukhokhelwa kukakwesta. Le mali ikhokhwe izigaba ezimbili - kufike kwakhokhwa u-r40 000, kwase kukhokhwa u-r54 000. Yonke le mali ingene ngaphambi kosuku lomcimbi.
Ngokusho kukamzoneli, baqede ukukhokha le mali ngomfumfu (October) bezama ukwenza ukuba izinto zihleleke kahle, kungabi bikho buhixihixi kanti ababuzanga elangeni.
Uthi bamlinde ukwesta kwaze kwasa ekuseni ngakusasa, nabantu sebediniwe bebona engafiki.
“Bekungasekuhle impela singazi nokuthi sizothini kubantu njengoba bebemlindele,” kulanda umzoneli.
Utshele leli phephandaba ukuthi kuthe sebemthinta ngakusasa wabatshela ukuthi uyaxolisa, ubanjwe wukushutha nomculi waphesheya kwezilwandle, uwale abenze naye ingoma esihloko sithi “Spirit”.
Ngobusuku obendulela usuku lomcimbi, ukwesta ubonakele ohlelweni lukamabonakude ilive AMP, ehambisana naso lesi silomo saphesheya kwezilwandle.
Osekuphinde kwacika kakhulu abahleli balo mcimbi ababambise udonga ukwesta - wukuthi usebonakale ezinkundleni zokuxhumana emaketha omunye umcimbi okhona futhi enewcastle, eqinisekisa ukuthi nakanjani uzofika kuwona.
“Ngicela sihlangane sonke Ekhaya Lounge ngomhla we-15 kuyona le nyanga (izolo ngomgqibelo). Kulokhu ngiyeza ngempela, ngeke kwenzeke ngingafiki,” kusho ukwesta kwi- video ebifakwe ezinkundleni zokuxhumana nguMahoota, ongumhleli walo mcimbi obuyizolo.
“Kusho ukuthi ukwesta udelela thina ngoba ethi useza okwangempela manje. "Ucabanga ukuthi thina besidlala yini,” kusho umzoneli ngokunengeka.
Uthi ngemuva kokuxolisa ukungezi akakaze abuyele kubona asho ukuthi imali uzoyibuyisa kanjani kodwa uzithulele nje.
Ethintwa YILANGA Langesonto ukwesta ngalolu daba uvumile ukuthi uyawazi lo mcimbi nokuthi akaphumelelanga kuwona. “Yiphutha lehhovisi lami. Bathathe imicimbi emibili kanye kanye.
"Yingakho nje ngigcine ngihlulekile ukuya (emcimbini) kodwa imali yabo izobuyela njengoba injalo ngoba yiphutha lethu,” kusho ukwesta.
Uthi vele uma engayanga endaweni imali uyibuyisela njengoba injalo.