IGAMA LOMSAKAZI WOKHOZI FM EZINGUQUKWENI ZE-SAFM
BAPHIKA balala ngomhlane abesouth African Broadcasting Corporation (SABC) ukuthi uqweqwe lwentatheli oselusebenzele ukhozi FM iminyakanyaka, ubongani Mavuso, lubhekise amabombo KWISAFM nayo eyenganyelwe yile nhlangano yokusakazela umphakathi.
Umavuso wenza izinhlelo zezindaba ezijulile okhozini FM futhi nguye ojwayele ukubamba izingxoxo nosopolitiki abangawubambi umshini, aphinde abe nolunye alwenza ezintathakusa ngempelasonto, oluthinta nezobuciko.
Eyokungena kwakhe kwiSAFM uthi naye ubone esethola umqhafazo nje uveka kothile embuza ngayo kodwa akunazinhlelo abenazo nalesi siteshi. Nentatheli imbuza nje yingoba ibithole umqhafazo oyazisa ngokuhamba kwakhe okhozini FM.
“Lutho qhawe lami, ukuba kukhona engikwaziyo engabe ngiyakutshela ngempela,” kusho yena kafushane.
Yinto ejwayelekile ukuthi abasakazi bashone ezintangeni zikhathi zonke uma bebuzwa ngeminyakazo yabo kuze kube sekugcineni ngoba babekelwa imigomo ebalawulayo yokuthi bangathi vu.
Khonamanjalo, omiswe emoyeni kwimetro FM ngomandulo (September) wonyaka odlule, uchriselda Dudumashe, kuleli sonto kuvele ukuthi naye useya ESAFM njengoba ezoqala ukusakaza kusukela kusasa kusihlwa ebambiseni nonaledi Moleo.
Laba bazongena kusukela ngomsombuluko kuze kube nguLwesine phakathi kuka-19h00 no-21h00.
Uchriselda umiswe kwimetro FM ngemuva kokusolwa ngo- kweseka obeyisekela likangqongqoshe wemfundo ephakeme, umduduzi Manana, obesolwa ngokushaya abesifazane endaweni yokujabula, icubana Lounge egoli ziyisi-6 kuncwaba (August).
Sekuwumlando ukuthi ligcine limgojelile leli cala, nababili abesolwa nabo. Uchriselda umiswe undendende, kwacaca ukuthi ngeke esaphindela kulo msakazo njengoba esevuka “kwababa omdala”, ISAFM eyenganyelwe yinhlangano eyodwa nemetro FM.
Olunye uguquko olukulo msakazo wuhlelo olwenziwa ngurowena Baird osezobambisana nobongi Gwala ohlelweni ithe Morning Talk kusukela kusasa.
Echaza ngokwenzekile umnu Kaizer Kganyago, okhulumela le nhlangano yezokusakaza, uthi phela izinguquko zenziwa noma yinini uma kunesidingo nakuba sekujwayeleke ukuba zenzeke ngombasa (April).
“Buka nje nokhaya ungene emetro FM kungalindelwe ukuthi kuzokwenziwa izinguquko ngakho-ke kakuyona ISAFM yodwa eyenza lokhu. Khumbula futhi ukuthi kunostation Manager omusha ngakho naye unezinhlelo zakhe.
“Ngeke sithi wayemisiwe emsebenzini uchriselda ngoba uyitoho kodwa ubengafakwa nje emoyeni. Ngeke futhi sithi bekuphenywa udaba lukamanana kodwa bekumayelana nendlela yakhe yokuziphatha. Usizakeleke futhi ngoba manje usezongena kane ngesonto nokuyizinsuku eziningi kunalezo abezisebenza emetro Fm,”usho kanje.
Ngodaba lukamavuso uthi: “Abasakazi engazi ngabo yilaba abasesitatimendeni kuphela, angiyazi eyabanye.”
zowakha@ilanganews.co.za