IZIYALO ZIKANKOSI KUNTSHANGASE
USIYABONGA “Doctor” Nkosi ozakhele udumo egijima kwikaizer Chiefs naseqenjini lesizwe lakuleli ibafana Bafana uyala umdlali omusha wale kilabhu obefunwa uthuli ngabalandeli ukuba alandwe.
Ichiefs imemezele ukuthi isayinise usiphelele “Stash” Ntshangase odlala esiswini obegijima kwibaroka FC.
Usayine inkontileka yeminyaka emibili nesigamu kanti bese kuneminyaka abalandeli bechiefs becela ezikhulwini ukuba asayiniswe.
Bezimubona enza izimanga kwiblack Leopards egijima kwinational First Division (NFD). Unkosi uthi kuzofanele luqine ngempela ukhakhayi kuntshangase ngoba iyashisa insimbi.
Unkosi uthi untshangase kufanele azi ukuthi njengoba ubefunwa ngabalandeli nje uthwele umthwalo wokuthi le kilabhu ibuyelwe yisithunzi.
Uthi kodwa ukuphumelela kwakhe kwichiefs kuncike kubadlali azobafica okuyibo nabo okufanele bameseke futhi bamethembe.
“Untshangase kufanele azimisele ngokwengeziwe kwichiefs aziphathe kahle futhi akuqonde ukuthi inkulu ingcindezi uma usugqoke ijezi lechiefs.
Unekusasa eliqhakazile ebholeni, udlala ibhola elihluke kakhulu kubadlali azobafica kwichiefs. Unomjiko omuhle oya phambili ngakho-ke kubalulekile ukuthi angashintshi indlela adlala ngayo ngoba efuna ukuchaza umqeqeshi kufanele aqhubeke nebhola abelidlala kwibaroka FC ekuqaleni kwesizini.
Uma nje uke wafuna ukushintsha ibhola lakho kwichiefs usuke usulimele uvele ungabe usazi ibhola okufanele ulidlale.
“Njengamanje ugeorge Maluleka udlala ibhola ongaliqondi ngoba ulwa nokudlala ibhola elifunywa ngumqeqeshi. Kangisho ukuthi kumele angahlonishwa umqeqeshi kodwa akufanele ashintshe isitayela okuyisona esenze ichiefs yamthenga,” kusho unkosi.
Unkosi ubeyisimenywa esiqavile ngesikhathi kwethulwa umkhankaso wokulwisana nokuhlukunyezwa kwabesifazane we-#no EXCUSE obusendaweni yobumnandi i-artizen Lounge ngeledlule.