Uma umuntu esekushaya usuke esedinga umthetho
1. NGIXAKEKILE, ANGIBATHOLI ABANTWANA
PASTOR, ngingumama oshadile kodwa angibatholi abantwana. Sengizame kaningi engikuyalelwa ngabantu kodwa kungalungi, sengize ngalilahla ithemba. Ngenzenjani?
IMPENDULO: Cha mama, angiqale ngizwelane nobuhlungu obhekene nabo. Ngicabanga ukuthi ubuhlungu obukhulu emhlabeni bubili - ubuhlungu bokungabatholi abantwana nobuhlungu bokushonelwa yingane.
Abukho ubuhlungu engicabanga ukuthi buyofana nalobo emhlabeni kodwa-ke asilamukele iqiniso lokuthi umntwana uyisibusiso esivela enkosini, akaveli kubantu futhi akaveli kudokotela - ngunkulunkulu kuphela ovumela ukuba ingane ibe khona noma ingabibikho.
Akuqali-ke ngawe ukulahla ithemba enkingeni yokungabatholi abantwana. Kukhona abazithola izingane sebeneminyaka eko-89 njengosarah.
Ngivamise ukuthi ummangaliso kankulunkulu uqala la sesithi kuphela khona amandla omuntu. Singalilahli ithemba, mama. Uma unkulunkulu engakasho, asokwazi ukuthi kusengenzeka noma yini. Ngicela ithemba lakho ulokhu ulibekile enkosini, wazi ukuthi ngelinye ilanga unkulunkulu uyokukhumbula.
2. SEHLUKANISWA YINKOLO EMZINI WAMI
PASTOR, nginenkinga emzini wami, sihlukene phakathi ngokukhonza. Unkosikazi wami usindisiwe, mina ngiyisayoni, manje uthi nabantwana bami mabalandele yena lapho ekhonza khona. Isimo sinzima impela emndenini wami, angisazi ngenzenjani.
IMPENDULO: NGIZWELANA nawe mfowethu esimeni obhekene naso. Kuyaxaka futhi kuyihlazo ukubona inkolo ihlukanisa umndeni. Bekufuneka ngabe umndeni uhlukaniswa ngusathane noma amadimoni, ungahlukaniswa yinkolo.
Ngicabanga ukuthi kufanele kuhlangane wena nomfundisi kankosikazi wakho. Kukhona izimo ezike zithi mazibheda zidinge amadoda. Ukube kuya ngami bengizothi makuhlangane umfundisi wakho, okankosikazi wakho, nawe nonkosikazi wakho niludingide lolu daba, nibone ukuthi isixazululo aniphumi yini naso.
Uma isixazululo singatholakali ungithinte baba kule nombolo engezansi, siyoba khona ngomzuzu owodwa nje isixazululo.
3. NGIQHUBEKE NAYE NOMA NGIMYEKE?
PASTOR, ngingowesifazane oneminyaka engama-21 ubudala.
Ngihlangane nowesilisa othize ngonyaka wezi-2014, bengikhulelwe ngaleso sikhathi, wangeshela ngaqale ngangabaza ukumqoma ngoba ngingamethembi. Ngokuhamba kwesikhathi ngamthanda.
Sineminyaka emine sithandene kodwa ngokungamethembi ngimjolele ngoba bengikade ngiphoxekile othandweni olungaphambili. Umuntu wenkosi ubene- qiniso, engithanda kodwa naye wagcina esengijolela, asisathembani kodwa sihlala ndawonye, asehlukani. Okubi nje wukuthi useyangishaya. Angazi noma ngiqhubeke naye noma ngimyeke.
IMPENDULO: DADEWETHU, ngicabanga ukuthi kulesi simo sakho kufanele siqale sibhekane nenkinga bese sithola isixazululo. Iqiniso la lisekutheni into edala ukuba ningathembani yingenxa yokuthi vele anithembekile nobabili futhi vele anithembekanga nobabili komunye nomunye kodwa-ke engingakuvumeli yilokhu kokuthi useyakushaya.
Akekho umuntu emhlabeni onelungelo lokushaya omunye umuntu futhi umuntu oshaya omunye kusuke sekufuneka abhekane nengalo yomthetho, akasadingi izandla zakho futhi akadingi nokuboniswa nguzondo.
Ezweni lakithi nje akuvumelekile ukuthi kube khona umuntu obeka omunye isandla. Ngithinteni nobabili kule nombolo engezansi ukuze ngikwazi ukuxoxa nani kuleli qiniso lokuthi anithembekanga nobabili yingakho ningasathembani manje.
Kodwa-ke ayikho into engalungiseki. Uma sengixoxa nani nobabili dadawethu sizobe sesikhuluma ngokungena ebudlelwaneni kanti usopha. Ungangeni ebudlelwaneni kanti awukakapholi.
Sengathi nofunda iphepha lethu, ILANGA Langesonto, angangalenza iphutha elenziwe yinina, lokungena ebudlelwaneni obusha kanti umuntu usopha. Hlala phansi uphole bese uqhubeka-ke nempilo.
4. NGISIZAKELE NGAWE PASTOR
PASTOR, ngibonga kakhulu ngempendulo engiyithole kwiLANGA Langesonto. Ngangibuze ngezwi elikumathewu 23:15. Ngisizakale kakhulu kanye nabazalwane. Inkosi isigcinele wena.
IMPENDULO: ASIBONGE mfowethu, ikakhulukazi asibonge iphephandaba lethu, ILANGA Langesonto, okuyilona elisivumele ukuba sibe nale ngosi yokusiza abafundi, siphinde sibonge nakubaphathi BELANGA Langesonto. Vele nje ibhayibheli lilodwa lisishiya nemibuzo eminingi. Sengathi wonke umuntu angake abuze ngaphambi kokugxeka. Okwenzile sengathi nakwabanye abantu kungaba yisibonelo esihle.
5. NGESABA UKUNGENWA
PASTOR, ngisindisiwe, ngashonelwa yindoda ngowezi-2013 ngase ngithola elinye isoka langisusa isinyama. Kodwa manje sengizongenwa. Inkinga yami wukuthi nginovalo ngale mpilo. Ngicela usizo.
IMPENDULO: CHA, dadewethu njengoba uthi unovalo ngesinqumo okumele usithathe, ngizizwa ngesaba ukubona umuntu elandela usiko kanti akalwazi. Ngikuzwa uqala ngokuthi usindisiwe kodwa khona lapho ukhuluma ngosiko lokukhipha isinyama, uphinde ukhulume ngosiko lokungenwa - ngicabanga ukuthi lokhu kuhla- nganisa kwakho lezi zinto kukhomba khona impela ukuthi udidekile. Uyabadinga abantu abadala abazokubonisa kahle, ungazithatheli wena isinqumo.
Ngicabanga ukuthi ukwesaba kwakho novalo onalo ngelokuthi usindisiwe - uthi usindisiwe kodwa ubukhipha isinyama, uthi ukhipha isinyama nakhu futhi sewuyangenwa.
Ziningi izinto esezenzeka kuwena kanti mhlawumbe abekho abantu abadala abahlale nawe bakubonisa. Njalo empilweni uma umuntu enokwesaba ngesinqumo azosithatha kusuke kunezinto anemibuzo engaphendulekanga ngazo.
Ngiyacela nawe uma uthola ithuba ungishayele ucingo kule nombolo engezansi noma uma kwenzeka ungangishiyela umyalezo, mina ngizokwazi ukukushayela. Kuyenzeka sisi njengoba sikholwa sizithole sekufanele senze izinto ezizosisiza empilweni kodwa kuyaye kufuneke kube nabantu abadala abazohlala nathi phansi basibonise ukuthi le nto uma uyenza usuke uyenzelani, yenziwa kanjani, nawe bese uyababuza.
6. OTSOTSI BADUBULA INGANE YAMI
PASTOR, ngifunde iphepha ngahlangana nendaba ethi ngingavumeli ingqondo yami ibe yifriji lezinkinga. Mfundisi, otsotsi badubula ingane yami yentombazane ngonhlolanja (February) wezi-2017. Ngicela imikhuleko ngoba akudluli, sekuyangigulisa.
IMPENDULO: ASIKUBONGELE dadewethu ukuthi enkingeni eyakuhlukumeza awuzange uzibambele umthetho ngesandla. Okwesibili, sikubongele ukuthi njengoba ubhala nje ngenkinga yakho, ubhalela umuntu osedlule ezinkingeni ezinkulu nasemahlazweni amakhulu.
Uma ukhuluma ngobuhlungu bokuthi le nto ayidluli, ngiyabazi ubuhlungu bokungadluli kwento ekugilile empilweni.
Yonke into empilweni eyehlela umuntu akasoze lowo muntu ayikhohlwa kodwa into esiyilwelayo wukuthi akusuke ubuhlungu ngale nkathi uyikhumbula. Akusho ukuthi empilweni uma umuntu ekudlwengulile uyokhohlwa yileyo nto kodwa kufuneka uma uyikhumbula ubese uyixoxa ungasakhali.
Yonke into oyosixoxela yona uhleka kusho ukuthi usuxolile kodwa ukuyikhumbula kuyohlala kukufikela. Ngicabanga ukuthi lezi ngezinye zezikhathi lapho siye sidinge khona unkulunkulu. Unkulunkulu ukwazi ukwenza into udokotela nabefundisi abangasoze bayenza.
Enye yezinto-ke edala ukuba usibone sisukuma sitotoba siya emasontweni yingoba unkulunkulu ukwazi ukwenza into umuntu angasoze ayenza emhlabeni.
Isimo sakho nje sisodwa siyamdinga unkulunkulu ukuze akushaye ngomjovo wokuqeda izinhlungu zalokhu okwakwehlela. Ukusikhumbula isimo kuyohlale kukufikela, uyoze ufe kodwa izinhlungu ziyophela, buza thina esashuthwa ngamantombazane sinqunu - izinhlungu seziphelile kodwa sisakukhumbula okwenzeka.
*Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
*Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo10h00 ejewish Hall. Uma udinga ama-directions thumela ISMS ku: 078 419 1024
Ngase ngithola elinye isoka langisusa isinyama, manje sengizongenwa.