EZIFINGQIWE:
* I-ECONOMIC Freedom Fighters (EFF) igasele kwancane indawo ezitolo zakwah&m esandton, emenlyn Park epretoria na-se-east Rand egoli izolo, yacekela phansi impahla. Lokhu kulandela ukuba lesi sitolo siveze isikhangiso esi-bukwe njengesicwasa ngokwebala, somfana webala elimnyama obegqoke ijakhethi ebhalwe ukuthi “coolest monkey in the jungle” nokuyinto eyaziwayo ukuthi iyazwela kwabamnyama njengoba zijwayelekile izigameko lapho abamhlophe besebenzisa leli gama “monkey” bebhekise kwabamnyama, oku-yisenzo sokucwasa.
Kuhambe isikhathi lesi sikhangiso sabe sesisuswa, baxolisa abalesi sitolo. Unina womfanyana ovela kulesi sikhangisi ubhale ekhasini lakhe lezokuxhumana wathi akaboni nencane inkinga ngalesi sikhangiso. Ubuze ukuthi ukube upose lesi sithombe ekhasini lakhe kungabe abantu bebezoyikhuluma yini eyokucwasana ngebala.
Lesi sitolo kasiqali ukuba semanzini abilayo njengoba phambilini sike sagxekwa ngesikhathi sethulwa eningizimu Afrika ngokusebenzisa abakhangisi abamhlophe kuphela.
* IZINHLANGANO ezahlukene okubalwa kuzo i-ahmed Kathrada Foundation, i-economic Freedom Fighters (EFF) ne-south African Communist Party (SACP) zisifakele izibuko isiphakamiso somvikeli womphakathi u-adv Busisiswe Mkhwebane sokuthi ikhomishana ezophenya mayelana nezinsolo zokubanjwa ngobhongwane kombuso ezithinta umengameli Jacob Zuma nomndeni wezinkinsela zakwaGupta, kumele yelule umsebenzi, ibheke nezinye izinsolo zenkohlakalo kuhulumeni, kungagcini ngokubhekwa okusembikweni ka-adv Thuli Madonsela esengumvikeli womphakathi. ISACP ithi lesi siphakamiso sika-adv Mkhwebane singahle sidicilele phansi isithunzi sehhovisi lakhe.
Ngemuva kwesikhathi eside nomdonsiswano, umengameli Jacob Zuma kuleli sonto ugcine eyiqokile ikhomishini yamajaji ezophenya ngalezi zinsolo zokubanjwa ngobhongwane kombuso.
U-deputy Chief Justice Raymond Zondo nguyena oqokwe nguchief Justice Mogoeng Mogoeng ukuba ahole le khomishini.
U-adv Mkhwebane esiphakamisweni sakhe esesimdalele amazinyo abushelelezi uthe uphenyo malungagcini nje ezintweni ezabe zibalulwe embikweni ka-adv Madonsela esengumvikeli womphakathi.
I-ahmed Kathrada ithi yize kukuningi okumele kuphenywe mayelana nenkohlakalo yangaphambi kowe-1994, kodwa le khomishini kumele igxile ezintweni ezivezwe kulokhu okusembikweni ka-adv Madonsela.
ABE-EFF bathi okushiwo ngu-adv Mkhwebane wukwengeza umsebenzi kungenasidingo. Ithi kufanele azifundise ukuvala umlomo ngezinye izikhathi.
* KUSUKE isidumo ngesikhathi kuqalwa ukubhalisa ezikhungweni ezahlukene zemfundo ephakeme eningizimu Afrika. Ecapricorn TVET College, epolokwane, kugcine sekulimala abafundi abayisithupha, oyedwa walimala kakhulu, kwahlehliselwa umsombuluko ukubhaliswa kuleli kolishi.
Kanti-university of South Africa (Unisa) esesunnyside epretoria kume nse ukusebenza ngolwesihlanu emva kokuba amalungu E-EFF egalakadele kule nyuvesi eyisola ngokuthi ayibasizi abafundi ukubhalisa futhi iphindesela abanye emuva.
I-university of the Witwatersrand (Wits) yona imemezele ngolwesihlanu ukuthi ngeke ibemukele abafundi abatheleka enyuvesi bezobhalisa ngoba ukubhaliswa kwabafundi abasha kuphothulwe ngonyaka owedlule. Kukholakala ukuthi isimemezelo semfundo yamahhala kubafundi abantulayo sangozibandlela (December) ngonyaka owedlule naso sibe nomthelela esiphithiphithini esidaleke ezikhungweni zemfundo ephakeme.