Umculi unesilonda sokungamazi uyise
EZOSAZIWAYO: Uthi kunzima nokushadelwa ngenxa yenkinga abhekene nayo
UMCULI ongusaziwayo nosomabhizinisi endimeni yomculo eningizimu Afrika, ozinze ethekwini, uthi inhliziyo yakhe ayikutholi ukuphumula selokhu wazalwa eminyakeni engama-45 eyedlule, ngenxa yokungazazi ukuthi ungowakwabani nokungamazi uyise.
Usandile Bhengu odume ngelikasandy B kwezomculo, udalule lezi zindaba ezibuhlungu engxoxweni abe nayo NELANGA Langesonto ethekwini, athi kungokokuqala ukuba agonyuluke ngazo nangemvelaphi yakhe.
Usandile uthi umlando wokuzalwa kwakhe ubheda ekuqaleni kuze kuyoba sekugcineni. Uthi unina unkk Duduzile Mamthethwa Bhengu (83) usadla anhlamvana nakuba esengumuntu ongasaphilile kahle futhi ongasazikhumbuli izinto eziningi.
Uthi bayisi-8 kunina sebebonke kodwa nguyena yedwa ongamazi uyise omzalayo.
“Umama ubeshadele kwabhengu, wathola abantwana abane khona, mina nabanye abathathu usithole ngaphandle emjolweni. Umama ngiqale ukumncenga ngisemncane ukuba angitshele ukuthi ngingowakwabani, ngubani ubaba wami. Ubelokhu ebika imbiba nebuzi, athi ubaba wamshiya ekhulelwe mina izinyanga zimbili, futhi wabe ezibiza ngoboy Gumede wasemlazi.
"Bekuthi uma ngimbelesela ngimbuza aphinde athi nalelo gama nesibongo akakukholwa ngoba lowo baba wayeganiwe, kungenzeka ukuba wayesho into engekho ngoba bagcinana kuleyo njabulo, akaphindanga wavela kwaze kwaba kuzalwa mina.
"Kuthe kamuva sengiphinda ngimbuza wacela ukuba ngingabe ngisambuza ngale nto, ngiqhubeke nempilo ngoba akukho angangisiza ngakho,” kubalisa usandy B.
Usandy B uqhubeka athi naso lesi sibongo sakwabhengu uyazenyeza ngaso ngoba abanikazi baso okhalweni lukanina bayamcwasa uma kwenzeka ehamba nabo, uma kuba khona obabuzayo ukuthi bangabakwabani isibongo.
“Uma ubheka ekhasini lami ezinkundleni zokuxhumana ngibhale ukuthi ngingusandy B Mantsinhe. Lo Mantsinhe yisibongo sikamkhulu wami ozala umama, owayedabuka emoza- mbique, wafika kuleli wazishintsha wazibiza ngesibongo sakwamthethwa enzela ukuthola umsebenzi. Okusho ukuthi inkinga yami yinkulu kakhulu ngoba angikwazi ukuzibiza ngesibongo sikamama sakwamthethwa ngoba naso akusona esakhe, uyise wa- yengowakwamantsinhe. Angikwazi nokuzibiza ngobhengu ngoba angizalwa khona,” kulanda usandy B.
Le nkiyankiya kasandy B uthi isimdalele izinkinga empilweni. “Kumele ngabe ngishadelwe kepha kuba nzima kimi ukushada nomzulu ngoba angazi noma ngizobe ngishada nodadewethu yini. Sengize ngicabange ukubheka umfazi kulezi ezinye izinhlanga engizokwazi kahle ukuthi kasihlobene.
"Kumanje nje nginezingane ezimbili zingibuza isibongo sami ziyime emthumeni. Sengilahle ithemba lokuthi ngiyoke ngizithole izihlobo zami zegazi ngisadla anhlamvana.
"Sengikwamukele ukuthi kanginazo izihlobo zakithi kepha impilo iyaqhubeka,” kuphetha usandy B wodumo lwengoma eyashisa izikhotha esihloko sithi “Amajovijovi”.
Abafundi BELANGA Langesonto mabalindele yonke ingonyuluka ngempilo kasandy B ngesonto elizayo, sizobe siphole naye.