KUVALWE IHHOVISI ELIKHULU LEMISAKAZO YOMPHAKATHI
KUMNYAMA bhuqe enhlokohhovisi yenhlangano eyengamele iziteshi zemisakazo yomphakathi inational Community Radio Forum (NCRF), kanti ubuholi bayo buntunta nendishi, abunandawo yokusebenzela selokhu kuvalwe ihhovisi.
Leli hhovisi ebelisenorth City House ebraamfontein, egoli, selifana nento engekho emuva kokuvalwa kwalo.
Kuthiwa livalwe ngoba kulungiswa kabusha ibhilidi kanti abanikazi balo (ibhilidi) kababange besazihlupha ngokubatholela indawo abangayisebenzisa okwesikhashana njengoba bebengebahle emabhukwini ezimali, bengakhokhi kahle irenti.
Kubikwa ukuthi amahhovisi asezifundazweni kawazi ukuthi kwenzekani, ezwa nje ngosizwile ukuthi livaliwe ihhovisi elikhulu.
Omunye umphathi wesiteshi esizinze ethekwini nongathandanga kudalulwe igama lakhe uthe bazwe ngosizwile ukuthi livaliwe ihhovisi.
“Okubi wukuthi nabahola INCRF esifundazweni kabanalwazi ngokwenzekayo,” usho kanje.
Ethintwa ongusihlalo weNCRF Kwazulu-natal (KZN), ophinde abe ngumphathi wemaputaland Community Radio, umnu Simon Ntsele, wenqabile ukuphawula achaze nokuthi ukuvalwa kwehhovisi likazwelonke kusiphazamisa kanjani isifundazwe. Unxuse ukuba kuthintwe umengameli wayo umnu Mduduzi Manana nogcine engatholakali ocingweni, wangawuphendula nomqhafazo athunyelelwe wona.
Umnu Emmanuel Nhlanhla Mtshali wenewcastle Community Radio, ongunobhala Jikelele WENCRF kuzwelonke uthi ziningi izinkinga abahlangabezane nazo bewubuholi obusha.
“Sazisiwe ukuthi ibhilidi liyalungiswa kodwa vele bekunenkinga yokuthi ubuholi obuphumile bebungakhokhi kahle. Bekumele sifukanyelwe yimdDA (Media Development and Diversity Agency) kodwa bangabe besasinika uxhaso ngoba ubuholi obebukhona phambilini buhlulekile wukuvezela umnyango wezokuxhumana owengamele lesi sikhungo ukuthi imali yaphambilini abebe- sixhase ngayo yenzeni.
"Njengoba thina sikhethwe ngonhlaba (May), kasikwazi ukwethula umbiko wokusebenza kwezimali wangaphambi kwethu ngoba lolo lwazi kalukho kithina.
"Ugqongqoshe womnyango ufuna umbiko (wezimali) ngoba ngeke sithole olunye uxhaso ngaphandle kwawo,” kusho umtshali.
Mayelana nokuthinteka kwamahhovisi ezifundazwe nokuthi bawazisile na ngesimo, uthe ngenhlanhla asebenza ngokuzimela lawo mahhovisi, kawancikile kwinhlokohhovisi.
“Umthethosisekelo omdala ubanikeza ilungelo lokusebenza ngabodwana nokuyinto esizoyibuyekeza kowamanje.
"Isibonelo nje IKZN izibambela yona ekuzifuneleni imali emabhizinisini azimele ukuze yeseke iziteshi. Nakuhulumeni yinto efanayo njengoba kunezinhlelo kusetshenziswana nehhovisi likandunankulu.
"Nakwezinye izifundazwe-ke yinto efanayo, ngakho ukuvalwa kwenhlokohhovisi kakuwuphazamisi umsebenzi wabo.
"Inkinga wukuthi kasikwazi ukubafaka esibayeni esisodwa njengamanje njengoba kungekho mali yoxhaso enjengale obekumele siyithole KWIMDDA.
"Sizowuthumela umbiko ogcwele namabhukwana olwazi ngokwenzekayo.
"Ngibathumelelile futhi abaphathi ama- email ngalokhu okwenzekayo. Njengamanje sisaxoxa nezinye izikhungo ezizimele ukuba zisixhase,” kuphetha umtshali.
zowakha@ilanganews.co.za