AYIKAZE IXOXWE EKA-SANDS WE-TIGI NOBEYIMENENJA YAKHE
NANAMUHLA uthi akakwazi ukuchaza ukuthi yini ngempela eyamosha ubudlelwane bakhe nosands wodumo lwetigi obeyimenenja yomsebenzi wakhe uphila Dlamini (Koshin), obuye asebenzele igagasi FM.
Udlamini ungumnikazi wenkampani i-icon PB Music nokuyiyo elekelele usands abadabuka naye eswazini ukuba afinyelele esicongweni njengoba edayise wafinyelela kwigolide ezinyangeni ezimbili vo ekhiphe i-albhamu, kwathi i-video yakhe yabukwa ngabantu ababalelwa ku-1.5 million kwi-you Tube kusaphele izinyanga ezintathu kuphela iphumile.
“Bengenza konke ngoba besinezivumelwano esisebenzela phezu kwazo. Nawe uyazi ukuthi nomthetho uyakuvuna ngokuthi uthi uma kunguwe okhokhela umsebenzi, uba ngumnikazi wawo, kodwake kakuzona izinto engifuna ukuzikhuluma lezo ngoba engikwazi kangcono wukuthuthukisa umculo nokuyikho i-icon ezoqhubeka igxile kukho.
"Kangifunanga ukubanga umsindo ngalokho. Uvele nje esikhaleni wathi usezozimela, azibambele. Nalokho ukusho ngoba sengibona ku-social media ukuthi sekunjalo,” kusho udlamini.
Kuzokhumbuleka ukuthi kube nemibiko phambilini emithonjeni ehlukene nengaqinisekiswanga ebithi usands uthi useyazimela ngoba esola ukuthi uxhoshwa ngodaka emehlweni. Abanye abazishwashwathayo bebethi usands usekhukhumele ngoba imali ibingena nxa zonke khona eswazini nalapha eningizimu Africa. Akathandanga ukukhuluma ngalezi zinsolo udlamini, egcizelela ukuthi kunabaculi abasha abasayinile manje nokuyiyona nto afaka kuyo wonke umdlandla wakhe.
“Sisayinise u-amanda Mo naye waseswazini ngoba sifisa ukuthuthukisa ulimi lwethu njengoba bekwenzeka naphambilini.
"Sibuye futhi safuna isinongo esihlukile sasayinisa owenza i-hip hop ubeast ( osesithombeni) wasethekwini.
"Kuyimanje ubeast ukumashadi emisakazo emikhulu okuwukhozi FM, Gagasi FM, Capricon FM neminye.
ILANGA Langesonto selizame lancama ukuthola usands ngoba isikhathi esiningi usichitha eswazini nokwenza inombolo yakhe ejwayelekile ingasebenzi. Kwenzeke okufanayo nakuleli sonto.