USUPHENDUKE INDAWO YEZOKUVAKASHA UMUZI KAMSELEKU
USUPHENDUKE enye yezindawo ezisemqoka kwezokuvakasha umuzi kamnu Musa Mseleku, wohlelo lukamabonakude oludumile uthando nes’thembu, olusakazwa kumzansi Magic.
ILANGA Langesonto lithole ukuthi le ndawo isingenye yalezo eziheha izivakashi (tourist attraction), ogwini oluseningizimu yekwazulu-natal.
Lokhu kuvezwe nguyena umnu Mseleku ngesikhathi leli phephandaba livakashe kwakhe ezinsukwini ezedlule.
Uthi sekunohlelo lokuletha nokwamukela izivakashi ezifisa ukubona umuzi wakhe.
Lolu hlelo luqhamuke ngemuva kokuba kubonakale inqwaba yezivakashi itheleka kwisithabathaba somuzi kamnu Mseleku onamakhosikazi amane.
"Ukutheleka kwabantu lapha kuze ngemuva kokusakazwa okokuqala kwalolu hlelo olukhombisa ngempilo yakhe nesithembu.
Babe sebebona ukuthi kunesidingo sokwenza uhlelo oluqondile futhi oluphephile ngoba abaningi bebevele batheleke ngaphandle kokuhlela naye.
“Bengivele ngithole ucingo olu- phuma lapha ekhaya kuthiwa kunabantu abasesangweni abathi bazobona umseleku namakhosikazi akhe,” kusho yena.
Uthi kukhona isikhathi lapho efonelwa ngabebesekhaya bethi kunamaphoyisa agcwele esangweni athi azobona yena.
“Abebesakhaya ngaleso sikhathi bese benokwesaba ngoba bebengazi ukuthi bazobabopha noma bazobopha mina.
"Bathe uma sebeye kuwona athi abefuna ukuzobona mina nomnde- ni wami kanye nomuzi wami,” kuqhuba yena.
Abantu abatheleka emzini wakhe kubikwa ukuthi baqhamuka ezindaweni ezahlukene ezweni.
Uthi-ke bahlangane nabesouth Coast Tourism, ababalethele abaphelezeli bezivakashi (tour guide) ngaphambi kokuba baqale bavumele abantu ukuthi bavakashe.
“Sihlale phansi nabo sabatshela ukuthi yikuphi esivulelekile ukuba abantu bakubone nokuthi yikuphi esingeke sithande ukukuveze- la umphakathi.
"Yibo-ke manje abaletha izivakashi lapha, bazichazele ngomlando waleli khaya,” kusho yena.
Uthi izivakashi zivumelekile ukubuza ezifisa ukukwazi nokuthatha izithombe kodwa kazivumelekile ukungena emagunjini okulala,” kusho yena.
Uthi-ke uhambo lokuvakashela emzini wakhe luba ngolwezihlanu kantu kuxhunyanwa nehhovisi lezokuvakasha ehibberdene, kwenziwe uhlelo.
“Ngoba abaningi bayakhala uma befika ekhaya singekho siyaye senze uhlelo lokuba siyobabona edolobheni ngaphambi kokuba bahlukane. Basuke benenhlanhla abasifica ekhaya ngoba singabantu abamatasa kakhulu,” kusho yena.
Unkz Mazethu Zondi oyi-general Manager Tourism Development kwi-ugu South Coast Tourism, uvumile ukuthi kunokusebenzisana okukhona phakathi kwabo nomnu Mseleku ngemuva kokuba efike kubo wazocela usizo njengoba ethe kunabantu abafika kwakhe kungekho uhlelo.
“Sibe sesihambela umuzi wakhe sayobona ukuthi lolu hlelo singalumisa kanjani njengoba sekunama- tour guide okuyiwona aqeqeshelwe ukuhola uhambo lokuvakasha khona ngoba phela yikhaya abahlala kulona leliya, futhi kumele siqinisekise ukuthi baphephile.
"Nangale kwalokho kukhona nezindawo izivakashi ezingavumelekile ukuba zingene kuzona,” kusho yena.
Uthe labo abathanda ukuvakashela umuzi kamseleku bangakwenza lokho ngokuxhumana nehhovisi labo.
nonhlakaniphos@ilanganews. co.za