BAHLELA UMNCINTISWANO WOKUFUKULA OKAMASKANDI
UHLELA ukwenyusa izinga lomculo kamaskandi umhleli wama Life Changers Awards. Uphathabakhe Shezi ozalelwe Kwadukuza ubona ukuthi liningi ithalente kulo mculo kodwa amaciko amaningi afufusayo anethalente kawalitholi ithuba lokuvelela, yingakho eseqhamuke nomncintiswano wokuwafukula.
“Ayinqwaba amaciko anothando lwalo mculo kodwa kuthatha isikhathi ukuba avelele, kakufani nalawa ashaya umculo wokholo othola ukuthi umuntu uzobonakala namuhla ngakusasa usedumile,” kusho yena.
Uthi amaciko azophumelela kulo mncintiswano bazowaqhakambisa aziwe.
“Kubalulekile ukuba waziwe uma usemculweni, ukwazi ukuzimaketha, kungapheli iminyaka emibili udumo lwakho selushabalele, ungasaziwa nokuthi wake waba khona,” esho. Uthi abantu abazobe behlunga ithalente kuzoba yilabo abasendimeni yomculo (abadidiyeli) hhayi noma yimaphi amaciko.
“Lokhu sikwenza ngoba sifuna abantu abazi kangcono ngethalente, abaziyo ukuthi ngumuntu onjani ozodayiseka. Uma sithatha abaculi sizobe sizifaka ehlathini ngoba abanye kabawuqondi umculo, sidinga abantu abawudidiyelayo,” kuchaza ushezi.
Uthi lo mncintiswano obizwa ngeMaskandi Competition bahlele ukuba wenziwe minyaka yonke.
“Sifuna ungagcini Kwadukuza kodwa sivakashele nakwezinye izindawo ngenhloso yokuvundulula amaciko anethalente,” kulanda yena.
Ozodla umhlanganiso, athathe inda- wo yokuqala uzoqopha izingoma ezinhlanu esizwa yiciko eselimnkantshubomvu, enzelwe i-music video, asatshalaliselwe umculo wakhe. Owesibili nowesithathu nabo bazothola ithuba lokuqopha izingoma ne-music video.
“Ama-music video esizobe siwenza sizoqinisekisa ukuthi asezingeni eliphezulu ukuze akwazi ukudlalwa kumabonakude kanti nezingoma ngokunjalo zizoba sezingeni elifanele,” kuchaza umnu Shezi.
tzondi@ilanganews.co.za