Uzimisele ukunyusa isibalo sabalaleli
KUYIPHUPHO labantu abaningi ukusebenzela inkampani enkulu futhi ebukeka ithuthuka minyaka yonke.
Nakuba inhlangano yezokusakaza isouth African Broadcasting Corporation (SABC) ibhekene nezingqinamba zezimali, kodwa isiteshi esingaphansi kwayo, ukhozi FM lusaqhubeka nokuhamba phambili ngesibalo esikhulu sabalaleli ezwenikazi i-afrika.
Lo msakazo usanda kumemezela ukuthi usuqashe umphathi omusha wezokumaketha ( marketing manager), unkz Sbongi Ngcobo. Le ntokazi ebukeka isencane ngokweminyaka kayilona ivukana endimeni yezokusakaza njengoba ike yasakazela igagasi 99.5 FM eminyakeni emibalwa eye-dlule.
Ngenxa yokuba nentshisekelo yokwazi kabanzi ngale ntokazi, ngenze imizamo yokuba sihlangane sizipholele, sixoxe ngokuthi iza nani kulo msakazo wabantu. Akubanga wumzukuzuku ukuxhumana nayo futhi isukumele phezulu ngesikhathi ngicela ukuhlangana nayo, yakhombisa ukukuthakasela ukuba nengxoxo NELANGA Langesonto.
UKWANDISA ISIBALO SABALALELI
Ngitheleka emahhovisi akwaSABC ethekwini njengesivumelwano sethu kanti nesikhathi ngisigcinile. Ngihlangatshezwe, ngayongeniswa ehhovisi likankz Ngcobo, wangemukela ngenkulu imfudumalo, emoyizela kuvela uthotho lwamazinyo.
Ngingene kwangicacela ukuthi ibhekene nomsebenzi omningi le nkosazane njengoba bekunemiqingo phezu kwetafula layo, namanye amaphepha akhombisa ukuthi imatasa. “Ngingakutholela okokuphuza?” kubuza usbongi ekhombisa ukungitatazelela.
“Ngifike ngolwezi (November) kumatasa ngomkhankaso wenyus’ivolume, ngakho kunezinto ebengingakabi naso isikhathi sokuzibheka kahle,” esho ehlala phansi engithelela amanzi.
“Kuyimanje ngisahlalelwe wukuzethula ngokusemthethweni kwabanye ozakwethu. Phela ngithe ngifika ngabe ngingena shi emsebenzini,” kuso yena. Uthi ukusebenzela isiteshi esifana nokhozi FM kakusiyona into encane, ngakho izinga lokusebenza kumele lihlale liphezulu.
“Ngiyajabula ngoba ngifike ngesikhathi ukhozi lusahamba phambili ngabalaleli. Okwami wukuqinisekisa ukuthi siyaqhubeka nokukhula, sithole abalaleli abasha ngaphandle kokuba sikhohlwe yilabo esesinabo,” kusho usbongi ozalelwe egroutville, Kwadukuza kodwa wakhulela esikhaleni, enyakatho yekwazulu-natal.
LUYASABALALA UKHOZI
Uthi okuhle wukuthi ziyanda izifundazwe lo msakazo osuzotholakala kuzona. “Njengoba sikhuluma nje, cishe izindawo eziningi e-eastern Cape ukhozi seluyazwakala, kanti nakwezinye izingxenye zefree State abantu sebezoluzwa.
"Inhloso wukuba ukhozi luzwakale eningizimu Afrika (yonke) nakwamanye amazwe angomakhelwane,” kusho unkz Ngcobo, kucaca nje ukuthi uzimisele ngomsebenzi wakhe futhi usengenile egiyeni lokusebenza.
Uthi nakuba kungekuningi azokushintsha kodwa uzimisele ngokuqhubeka lapho kushiye abebeqhoqhobele lesi sikhundla phambilini.
“Kumele ngikucacise ukuthi imikhankaso ethinta ezemfundo sizoyiqhakambisa ngoba siyafisa ukuxhumana nabantu abasha babe yingxenye yomsakazo wabo. Sifuna baziqhenye ngesizulu nangamasiko abo, bangazenyezi,” kusho le ntokazi ekhuliswe ngunina. Udalule ukuthi uthokozile ngabasakazi abakhona nakuba engagxilile ngokwenzeka emoyeni kodwa umsebenzi wakhe uyahambisana nakho (okwenzeka emoyeni) njengoba kumele amakethe umsakazo kubantu.
UKUTHUTHUKISA UKHOZI FM KWEZOBUCHWEPHESHE “Kubalulekile futhi ukuba sikhule nakwezobuchwepheshe njengoba isikhathi esiphila kusona kuyibona obuhambaphambili. Abantu baphila esikhathi sokuzikhethela abakufunayo njengoba umqhudelwano wababukeli ukhula.
"Sikhuluma nje imisakazo iyanda, kunama- online radio, imisakazo yomphakathi, ama-cd - konke lokhu siqhudelana nakho, ngakho kubalulekile ukuba abalaleli sibenze bayeke konke balalele thina kuphela.
"Kumele basikhethe ngaphandle kokuphoqwa, basenze sibe yingxenye yempilo yabo,” kuchaza usbongi obezifela ngezemidlalo ngesikhathi esakhula ikakhulukazi i- hockey nokubhukuda.
Njengoba siqhubeka negxoxo kuyangicacela ukuthi uma ukhuluma ngomsebenzi azimisele ukuwenza kulo msakazo, kungasa emnyango. Ukhuluma ngokuzethemba nangephimbo elihehayo okuthi thula ulalele aqeqebule yedwa. Ngenxa yaleli phimbo ngimbuza ngothando lwakhe lokusakaza.
“Nakuba bengizifela ngomkhakha wezokusakaza kodwa bengingakaze ngizibone ngiwumsakazi,” kulanda yena.
Ithuba lokuba semsakazweni okokuqala livele ngesikhathi eqashwa yigagasi 99.5 FM.
“Ngiqashelwe ukuthengisa izikhala zezikhangiso kodwa ngenxa yokuthi bekukuningi ebengikwenza kulo msakazo, ngigcine sengithola ithuba lokusakaza uhlelo lwantambama ngezimpelasonto nomzokoloko (Mzo Gumede). "Bengibuye ngibe wumdidiyeli walo lolu hlelo obelubizwa ngemo Fire,” esho ehleka ngalo lelo phimbo.
Uthi ubebuye abambele abanye abasakazi uma bengekho futhi enze nezikhangiso.
UKE WASEBENZA NASENDAWENI YOBUMNANDI Ngemuva kokuphothula umatikuletsheni ubabele esikhungweni semfundo ephakeme, i-university of Kwazulu-natal lapho enze khona ibachelor of Arts.
Ngemuva kokuphothula lezi zifundo - uqhubekile wenza i-honours kwicultural Media Studies nokuthe angaziphothula wasebenza edurban Film Office ngaphambi kokuba aqashwe yinkampani kagwayi.
“Ngisasebenza kule nkampani kagwayi ngibe sengiqashwa endaweni yobumnandi ebibizwa ngezulu Jazz Lounge lapho engibe khona yi- marketing manager,” kuqhuba yena.
Uphinde wanyelwa yinyoni esandleni esuka kwigagasi ejoyina itru FM ezinze e-eastern Cape, eyothatha esikhundleni sokuba yi- marketing manager. “Ngihlalile etru FM njengoba kukuningi engikwenzile ukuthuthukisa lo msakazo ngaphambi kokuba ngize okhozini ngoLwezi,” esho.
OKUNYE ONGAKWAZI NGAYE
Akashadile futhi akanayo ingane; Ukhonze ukufunda izincwadi ikakhulukazi ezishintsha impilo; Uzichaza njengomuntu ohlale enentshisekelo yokuthola ulwazi; Uyazifela ngomculo ikakhulukazi we- hip hop, nopholile; Uyaweseka umkhankaso wokudlala u-90% womculo wakuleli;
Ungumlandeli wamaqembu ibarcelona, i-arsenal, ikaizer Chiefs namasharks;
Uyazifela ngezemidlalo zasemanzini; Uzilolongela ukuba yingxenye yomqhudelwano imidmar Mile.