EZESIMANJE:
UKUQALA konyaka kusho ukuqala kwezinto eziningi kwabaningi. Kukhona abayoqala emisebenzini emisha, ezinkampanini ezintsha, abanye bayoqala ezikoleni ezintsha.
Kulabo abaqala impilo entsha yizitshudeni eziqala ngqa ukunyathela ezikhungweni zemfundo ephakeme.
Kulezi zitshudeni, lesi yisikhathi esingelula neze kwazise impilo isuke isishintsha, iza nezinto eziningi ezahlukene ezintsha njengokuhlala ngaphandle kweso labazali, wukwanda komsebenzi wesikole, yingcindeni engabangwa yizinto ezahlukene ezenzekayo ezihambisana nale mpilo entsha, nokunye okuningi.
Abanye, imvamisa abasuka ezindaweni zasemakhaya, babhekana nanenselelo yokujwayela nokumelana nempilo yasemadolobheni lapho abasuke sebefudukela khona.
Enye yezinto ezingadala ingcindezi kwabasuke befika ezikhungweni zemfundo ephakeme kuba yindlela yokugqoka, kwazise kusuke kungasagqokwa umfaniswano njengasezikoleni abasuke bephuma kuzo.
Ukujwayela nolimi lwesingisi futhi kungaba yinselelo kwabanye ikakhulukazi abavela kulezo zikole ezisezindaweni ezisasalele kakhulu ngentuthuko.
Ezinye izitshudeni ezifikayo zibhekana nenselelo yokuthi zizithola zicwaseka lapho zifisa ukuba yingxenye yezingxoxo ezivuka emakilasini ngenxa yolimi, kube nzima ukuzibandakanya kulezo zingxoxo.
Phela kulezi zikhungo kusuke sekuhlangene abafundi abebefunda ezikoleni ezihamba phambili ngezinga lemfundo, ngabafundi bebala elimhlophe nezinye izinhlanga, nalabo abebefunda ezikoleni ezintulayo ezikwanja kayiphume.
Abanye baba ngisho nanenselelo yokwakha abangani abasha.
Akubi lula kwabanye ukuthola umngani kwazise akusafani nasesikoleni lapho ubuthola ukuthi niyazana ngoba mhlawumbe nihlala ngandawonye.
Enyuvesi kusuke kukhona lonke uhlobo lwabantu abakhuluma izilimi ezahlukene.
Abanye abafundi abasha baba nenkululeko yokuziphatha ngokweqile, bagcine beshomana nabangani ababi, badoje amakilasi, babe wuhlupho, bagcine bethole imiphumela engemihle ekupheleni konyaka.