BAYAZIKHULUMELA NGEZINSELELO ABADLULE KUZO
Unokuthula Khanyeza obenza unyaka wesithathu kwi-bachelor of Education e-university of Kwazulu-natal uthi bekungelula neze ngesikhathi efunda unyaka wokuqala.
“Ngibe nengqinamba ngasezimalini emva kokuba ngifake isicelo soxhaso kwi-national Student Financial Aid Scheme (NSFAS) nakwifunza Lushaka ngangaluthola.
"Ngifunde unyaka wonke kodwa kwathi uma sekumele ngithole imiphumela yami kwaba yinkinga. Yilapho-ke ngibone khona ukubaluleka kokubuza indlela kwabaphambili, nokuyibo abangitshele ukuthi kwenziwa njani ukuze ngikwazi ukuba ngiqhubeke nezifundo zami kodwa ngibe ngingakhokhile. Nebala ngenze njalo ngaze ngathola usizo kwifunza ngonyaka olandelayo,” kuchaza yena.
Uthi akazange azixake ngezinto zobumnandi ngoba bekungesiyo into akhule eyinakile. Ngaphezu kwalokho usuke kubo abazali sebemyalile.
Uthi kubalulekile ukuba wazi ukuthi uyokwenzani esikhungweni semfundo ephakeme uma uphuma ekhaya.
“Ngingathi nje kubalulekile ukuba uqinise ezifundweni futhi uziphathe kahle ukuze ukwazi nokuthola uxhaso lwezimali ngoba zonke lezo zinto ziyabhekisiswa,” kulanda yena.
Unomvelo Maphumulo oqede ngowezi-2017 inational Diploma in Marketing, emangosuthu University, uthi ziningi izinto abhekane nazo ngesikhathi eqala ukuyofunda kulesi sikhungo.
“Okokuqala kube ukuduka nje esikhungweni kwaphela cishe izinsuku ezimbili (ngiduka).
"Okwesibili bengihluleka wukufika ngesikhathi ekilasini, mhlawumbe kwesinye isikhathi uthole ukuthi i- lecturer izokuxosha uma ufike emva kwesikhathi kodwa ngagcina sengijwayele.
"Ukuhlangana nabantu abasha nakho kube yinkinga ngoba bekukhona abavela emndenini ecebile, abanye bevela kwedla imbuya ngothi, kwesinye isikhathi uthole ukuthi kuba nokuchomelana,” kuchaza unomvelo.
Uthi into emenze wakwazi ukuba aphumelele wukuzazi ukuthi ufunani.
“Ukuzazi ukuthi ngifunani, ukwazi ukuthi ngiphuma ekha-ya elinjani yikho okungisizile.
"Ngaphezu kwalokho bengifuna abazali bami baziqhenye ngami.
"Uma ufuna ukuphumelela kumele wazi ukuthi uyokwenzani enyuvesi,” kusho yena.