EZEMISAKAZO:
UKUDIDEKA enginakho muva nje ngendlela okusetshenzwa ngayo kwisouth African Broadcasting Corporation (SABC), kakusoze kwafaniswa nalutho.
Ake nisho, kwenzeka kanjani ukuba ilungu lomndeni lidingiswe ngoba kuthiwa lonile ekhaya kodwa ngakusasa livele selihlala kwababa omdala sekuthiwa hhayi kalinacala ngesenzo elasenza nakuba lingeke lisabuyela emndenini walo oqondile njengoba lizalwa ngubaba omncane?
Yikho kanye lokhu okwenzeke KWISABC. Okubuhlungu nokungidide kakhulu wukuthi ngizame ngancama ukuthola impendulo eqondile kokhulumela le nhlangano, umnu Kaizer Kganyago, kodwa wavele washona wavumbuka. Imi kanje le ndaba.
Ngomandulo (September) wonyaka odlule kumiswe ucriselda Dudumashe emetro FM emuva kokuzwakalisa kwakhe eseka obeyisekela likangqongqoshe wemfundo ephakeme, umnu Mduduzi Manana oshaye owesifazane endaweni yokuzijabulisa icubana Lounge, egoli. Ngishaqekile ngesonto eledlule ngithunyelelwa uhlu lokushintsha kwezinhlelo ZESAFM sengihlangana negama likacriselda noqale ukusakaza khona ngoMsombuluko odlule engena nonaledi Moleo.
Okungishaqisile wukuthi kwenzeka kanjani ukuba amiswe emetro FM ngoba ephambukile ngokuziphatha kodwa aqhamuke esezosakaza KWISAFM, ekubeni zombili lezi ziteshi zenganyelwe YISABC, nokulindeleke ukuba zisebenzele ngaphansi kwemigomo efanayo. Yini pho le eyenze ukuba achithwe emetro FM kodwa akwazi ukungena ESAFM?
Lokhu kungishiye nombuzo othi kungenzeka yini kusasa ulinda Sibiya ochithwe okhozini FM ngezinsolo zokukhwabanisa avumbuke kwesinye isiteshi esenganyelwe yile nhlangano eseqashwe kabusha? Kungenzeka yini sizwe uchillie M esempongoloza kumhlobo Wenene nakuba echithwe okhozini FM ngezinsolo zokugwazisa?
Impela namanje ngisadidekile futhi kungicacele ukuthi ukudideka kwami ngeke kuphele njengoba ukganyago evele wangikhulumela isishalambombo. Kungabe lokhu kusho ukuthi uchriselda ubengonanga emetro FM, kodwa bazizwe nje bengasamdingi, base bezama indlela abebengamxosha ngayo?
Ngicabanga ukuthi iziteshi kumele zibe nendlela ecacile ezisebenza ngayo engezosidida futhi engezosishiya sinemibuzo engenazimpendulo. zowakha@ilanganews.co.za
* Singayithokozela kakhulu neyakho imibono ngakho konke okuthinta ezemisakazo. Ungasithinta kule e-mail engezansi nasezinkundleni zokuxhumana okutholakala kuzona umbhali.
Instagram: @zowakha
Facebook: Zowakha Mbatha Twitter: @Zowakha zowakha@ilanganews.co.za