SIVULA AMEHLO ABACULI: Zisengashisa izikhotha izingoma ezindala
ABACULI mabakucabange ukuthi ezinye zezingoma zabo ezindala abazenza eminyakeni eyadlula zingabuye zishise izikhotha uma bezenza kabusha esikhathini samanje.
Kuyaziwa ukuthi i-albhamu ivamise ukuba nezingoma eziyi-8 noma ngaphezulu kodwa esikhathini esiningi iba yinye evelelayo. Kungaba wumqondo omuhle ukuba kuthathwe lezo zingoma ezingazange zigqame kuleyo albhamu zinongwe kabusha, bese zibuyiselwa emakethe - hleze zithole udumo olumangalisayo, zishise izikhotha.
Kungenzeka futhi ukuba intsha yanamuhla izithathe izipheke kabusha kulolu hlobo lomculo wayo odla lubi kulezi nsuku obizwa ngokuthi yigqomu. Kudala emsakazweni ukhozi FM kwakunohlelo olwalusihloko sithi “Ayigugi lengoma”.
Kunjalo ngempela, ayigugi ingoma futhi umculo kawupheli - ingoma eyodwa ungayishintshashintsha igile izimanga emakethe. Kulabo asebalahlekelwa yizingoma zabo noma osekwavalwa izinkampani ababeqophe kuzo, nalabo abangasenawo amarekhodi lezo zingoma zabo noma amakhasethi angaleso sikhathi kungafanele baye emisakazweni bayobheka ukuthi azisekho yini khona.
Umsakazo uyamboleka umculi ingoma ayoyiqopha kabusha, inqobo nje uma enobufakazi bokuthi ingeyakhe.
Iningi lezingoma zakudala bezixoxa indaba enesifundo, abaqambi bazo bebengadavuzi nje basho imisho emibili bafake isigqi ( beat) kube sekuphelile.
Bezinezeluleko izingoma noma zifundise okuthile kwesinye isikhathi, ngisho ulimi lukhulunywe ngendlela eyiyo. Abaculi abaningi asebaphelelwa yithemba kule ndima yezomculo liyavuseleleka lime ngezinyawo uma sebezwa izingoma zabo ezindala zivuka.
Kuwumzukuzuku ukuqamba ingoma ehlabahlosile, kakwehlukene nokuzalwa kwengane yona efuna ukunakekelwa isesesiswini sikanina, ilungiselelwe nokuzalwa kwayo, kuthi ingazalwa kuqale kubhekwe ukuthi ibulili buni, nokuthi kumele ikhuliswe kanjani.
Nengoma uma isiqanjiwe kumele ilungiswe, ifakwe izithako ukuze ilungele abathandi bomculo.
Izingoma zeqembu elalibizwa nge-cjb likaneo Maphaka ezifana nethi “The Boss is Back” “Ikhekhe lakho mfana” zingavuka kushe izikhotha.
Ziningi izingoma ezimnandi ezi- ngalitholanga ithuba lokuvelela ngenxa yengoma eyodwa eyasuke yadla ubhedu ngalezo zikhathi.
Silindele abaculi abangenazo iziphiwo zokuqamba izingoma kodwa abaphiwe ukuzilungisa nokuzithaka abafana nentokazi yakwaMashu uhlengiwe Mhlaba othatha ingoma kanoma ngubani ye- gospel agile ngayo izimanga.
Lokhu kuvuswa kwezingoma zenziwe kabusha mhlawumbe kunganciphisa nale nto yokuphindaphindwa kohlobo olulodwa lomculo olusuke lubonakala ludayisa kangcono ngaleso sikhathi.