Ubuchwepheshe bunobuhle nobubi
Basengcupheni abenza imisebenzi esemazingeni aphansi
KUKUDE lapho kuyiwa khona nezobuchwepheshe. Mhlawumbe akekho owayazi futhi elindele ukuthi ezobuchwepheshe zingathuthuka ngale ndlela esezithuthuke ngayo namhlanje.
Kuhle futhi kuyathokozisa ukuthuthuka kwezobuchwepheshe ngoba isikhathi esiningi ubuchwepheshe lobu benza impilo ibe lula kodwa futhi le ntuthuko idinga ukubhekwa ngelinye iso njengoba inamacala amabili - elihle nelibi.
Lukhulu ushintsho emphakathini nakubantu nje jikelele oludalwa yile ntuthuko yezobuchwepheshe.
Kulo lonke ushintsho eza nalo mhlawumbe olwethusa kakhulu, nolwenza abanye bashaywe wuvalo uma beyicabanga yindaba yemisebenzi.
Iqiniso wukuthi miningi imisebenzi ebiyenziwa ngezandla eminyakeni eminingi eyedlule kodwa manje esiyenziwa yimishini ngenxa yayo belu intuthuko yezobuchwepheshe.
Ziningi izinkampani ezithuthuka ngesivinini ngakwezobuchwepheshe. Kunochwepheshe abachitha isikhathi becabanga, besungula imishini noma beqhamuka namasu okwenza izinto kusetshenziswa ubuchwepheshe.
Njengoba sishilo, ukufika kwale mishini yobuchwepheshe kukhona lapho kusiza khona - njengokuthi nje kwenza indlela yokusebenza ibe lula, nempilo nje ibe lula. Ngaphezu kwalokho kusiza abaqashi ukuba umsebenzi wabo uhambe ngokushesha, kwenyuke izinga lomkhiqizo.
Kodwa ngakolunye uhlangothi kunganciphisa amathuba emisebenzi ngoba phela eminye imisebenzi yenziwa yimishini.
Kufaka itwetwe nakwezinye izisebenzi lokuthi zingase zidilizwe ngoba zibona kuncipha isidingo sazo ezinkampanini lapho eminye imisebenzi isiyenziwa ngezindlela ezisheshayo zobuchwepheshe ezingadingi umuntu.
Le ntuthuko kanye netwetwe elikhona lokuncipha kwamathuba emisebenzi ngenxa yayo yinto esabalele umhlaba wonke, kanti ziningi izinkulumo mpikiswano eziqubukayo ngayo le ndaba.
Mhlawumbe nje uma singakha phezulu, sibale eminye imishini noma intuthuko esibonakele yezobuchwepheshe singaphawula ngalokhu:
Pick ‘n Pay
Ngowezi-2016 kuqubuke ukukhathazeka kwabaningi, kwasolwa inkampani upick ‘n Pay ngokuthi iphezu kwetulo lokudiliza inqwaba yezisebenzi ngemuva kokwethula uhlelo olusha lwemishini ezosetshenziswa ngabathengi uma bekhokhela impahla.
Le mishini ayidingi ukuthi kuze kube nomshayi wesisefo njengoba umthengi ezenzela yena, aqede ukukhokha aphume ahambe.
Ngemuva kokwethulwa kwalolu hlelo ngaleso sikhathi okuthiwe lusavivinywa, ngisho izinyunyana zezisebenzi zisukume zama ngezinyawo ngoba zikholwa wukuthi lubeka engcuphezi izisebenzi.
Nokho le nkampani izithethelele ngokuthi yenzela ukuba abathengi bengalokhu bema olayini abade, belindele ukusizwa ngothela.
Abalesi sitolo bechitha eyokudilizwa kwezisebenzi bathe ngeke lube namthelela ngoba imishini le izobhekwa yizona izisebenzi.
Ezobuchwepheshe emabhange
Njengamanje cishe wonke amabhange amakhulu eningizimu Afrika asebenzisa izindlela zobuchwepheshe ezintsha zokubhenka nezithathwa ngokuthi zilula futhi ziyashesha.
Ezinye zalezi zindlela zenza singabi bikho isidingo sokuya egatsheni lebhange uma ufuna usizo oluthile.
Zinikeza amaklayenti ithuba lokukwazi ukuzenzela izinto ezithile esebenzisa zona izinhlelo ezithile zobuchwepheshe bamakhompyutha nomakhalekhukhwini.
Amakilayenti amaningi awasayi emabhange uma efuna ukuthumela imali noma efuna ukukhokhela okuthile, kodwa asevele acofe komakhalekhukhwini nakumakhompyutha, nanoma ngasiphi isikhathi.
Phakathi kwamabhange amakhulu eningizimu Afrika, okuyilona elibonakala lihamba phambili ngokuhlale lethula izindlela ezintsha zokubhenka kusetshenziswa ubuchwepheshe yifirst National Bank (FNB).
Kukhona-ke ukwesaba nezinkulumo zokuthi njengoba amabhange engena shi kwezobuchwepheshe, lokho kuzoholela ekuncishisweni kwesibalo sezisebenzi emagatsheni ngoba vele umsebenzi omningi kazisenawo.
Phambilini ngesikhathi ILANGA Langesonto likhuluma nomnu Jacques Celliers, oyichief Executive Officer YE-FNB, emcimbini obusecape Town, wokwethula olunye uhlelo lwezobuchwe- pheshe kuleli bhange, olubizwa ngokuthi YIFNB Connect ukuchithile ukuthi bazodiliza izisebenzi ngoba sekusetshenziswa kakhulu ubuchwepheshe.
Umshini wokuxova udaka nowokuplasitela
Ziningi kakhulu izisebenzi ezisembonini yezokwakha.
Phakathi kwazo kukhona ababeka istini, womapendana, ngabaxova udaka, ngabafakela uphahla kanye nabeplasitelayo.
Cishe eminyakeni eminingi edlule akekho owake wacabanga ukuthi kuyoke kube khona umshini wokuplasitela udonga, kodwa namhlanje usukhona.
Mhlawumbe futhi kudala akekho owayecabanga ukuthi kuyoba khona umshini wokuxova udaka njengoba kwenzeka manje.
Umshini ohlahla umoba
Kusukela kudala kunenqwaba yabantu abasebenza emapulazini abahlahla umoba futhi namanje basekhona.
Nokho nakhona kulo msebenzi eminyakeni eyedlule kubonakele ukuthi ikhona intuthuko yezobuchwepheshe ngemuva kokuba kungene imishini ehlahla umoba, eminye iwuthuthe iwulayishe emalolini amakhulu. Ukufika kwale mishini ehlahla umoba kusho ukuthi kwamanye amapulazi asisekho isidingo sokuqasha izisebenzi ezizohlahla ngoba vele umsebenzi usuwenziwa wumshini.
Kuningi kakhulu esingakubala okukhomba indlela esihanjiwe kwezobuchwepheshe kodwa lapha bekuwukukha nje phezulu.