NGAPHANDLE KWENKUNDLA:
KUMQINISE kakhulu ukhakhayi ukugijima kumaligi amancane usiyethemba Mnguni ogijima kumazulu FC angomakoti kwiAbsa Premiership njengoba kade eyibambe kwinational First Division (NFD).
Lo mdlali uzalelwe elista Farm kodwa wakhulela osizweni, enewcastle. Udlale kwinewcastle Cheetahs ebidlala kwisab League nakwimajuba United Killers kwiSouth African Football Association (Safa) Kwazulu-natal ABC Motsepe League. Usuke lapho wayokwenza inhlolokhono kwiMbombela United edlala kwinfd wayiphasa.
Uthi ubonga kakhulu ushephered Murape okunguyena omnikeze ithuba esigabeni esikhokhelayo.
Usuke kwimbombela wajoyina usuthu afike kulona maphakathi nonyaka odlule.
Lo mdlali ufunde ecebelihle Primary naselewis Batranbs High School.
Ingxoxo kamnguni LELANGA
Langesonto ngempilo yakhe yangaphandle kwenkundla ihambe kanje:
ILANGA Langesonto: Uyakholelwa ekusebenziseni umuthi?
Mnguni: Angiwuxwayi umuthi. Uma ngidlala ekilabhini ewusebenzisayo nami ngiyawusebenzisa.
ILANGA Langesonto: Ungazichaza njengomuntu onjani kongakwazi.
Mnguni: Ngiwumuntu okuthandayo ukuhlala nabantu. Ngithanda ukuhlala nabantu abaziphethe kahle futhi abangelona uvanzi.
ILANGA Langesonto: Basekhona abazali emhlabeni?
Mnguni: Yebo basekhona. Umama ngunokuthula Mtshali, kanti ushade novusi Mtshali. Ubaba ongizalayo ngusmiso Mnguni. Sibaningi ekhaya njengoba ngizalwa nonjabulo, ukhayo, usiyethemba nolungile.
ILANGA Langesonto: Usugcagcelwe?
Mnguni: Angikakashadelwa kodwa sengimtholile umaqondana engihlela ukumthatha ngokugcwele. Nginezingane ezimbili okungu-esihle no-amahle.
ILANGA Langesonto: Usichitha kanjani isikhathi sakho uma ungekho matasa ebholeni?
Mnguni: Ngikhonze ukuzihlalela endlini. Angiyena umuntu owuvansi.
ILANGA Langesonto: Iyiphi into yokuqala oyenzayo uma uvuka ekuseni?
Mnguni: Ngivuka ngibuke izindaba zezemidlalo kumabonakude bese ngilungiselela ukuya ejimini kwazise siqala ekuseni kakhulu ukujima.
ILANGA Langesonto: Yiluphi uhlelo olukhonzile kumabonakude? Mnguni: Ngithanda imidlalo eminingi eboniswa kumzansi Magic kodwa ohamba phambili yisibaya. Ngikhonze kakhulu uthandeka (olingiswa ngunomzamo Mbatha).
ILANGA Langesonto: Ushwibeka ngaluphi uhlobo lwemoto?
Mnguni: Ngisebenzisa ipolo TSI engiyithenge ngonyaka odlule.
ILANGA Langesonto: Ukhona ezinkundleni zokuxhumana?
Mnguni: Ngiyazesaba izinkundla zokuxhumana. Uma unganakile ungazithola usulahlekelwa wumsebenzi ngenxa yazo. Ngisebenzisa ifacebook nowhatsapp kuphela. Nakhona kwifacebook angimningi yize ngisebenzisa isamsung Grand Prime.
ILANGA Langesonto: Yini enhle osuke wayenzela abazali bakho selokhu ungene ebholeni elikhokhelayo?
Mnguni: Ngibasizile ukushintsha impahla yasendlini ekhaya.
ILANGA Langesonto: Usavakasha nje emakhaya noma usugwinywe yitheku?
Mnguni: Ngikukhonze kakhulu ukuvakashela umndeni wami enewcastle. Kade ngikhona njengoba kade sivalele amaholidi.
ILANGA Langesonto: Uhlala ezindlini zekilabhu noma unendawo yakho eceleni?
Mnguni: Ngihlala kwelinye ibhilidi emorningside. Nokho-ke ngeke ngilisho ngegama ngenxa yezizathu ezahlukene.
ILANGA Langesonto: Ukhonza kuluphi ibandla?
Mnguni: Ngikhule ekhaya kusontwa ezayoni. Kade ngagcina ukuya esontweni ngenxa yokuxinwa wumsebenzi webhola. Ngikukhonzile nokuhlaba kwazise ngikholelwa kakhulu kwabaphansi.
ILANGA Langesonto: Iyiphi ikilabhu okhule uzifela ngayo kuleli naphesheya kwezilwandle?
Mnguni: Kuleli bengithanda ikaizer Chiefs kanti phesheya ngithanda ibarcelona yasespain. Umdlali engimthandayo kwi-absa Premiership ngureneilwe Letsholonyane wesupersport United. Phesheya bengichazwa nguxavi Hernandez obegijima kwibarca kodwa manje osedlala eqatar.
ILANGA Langesonto: Yiliphi izwe ofisa ukulivakashela?
Mnguni: Ngihalela ukuyophola edolobheni idubai, e-united Arab Emirates.
ILANGA Langesonto: Yisiphi isilwane osithandayo nosesabayo?
Mnguni: Asikho isilwane engisikhonzile, kodwa ngilesaba kakhulu ibhubesi nengwe.
ILANGA Langesonto: Uthanda umbala onjani?
Mnguni: Ngizithandela umbala osasibhakabhaka. Ngiwukhonze ngisesemncane lo mbala.