Imaritzburg ishaya indesheni kwichiefs
Ifuna ukubolekwa umdlali oselizwa ngendaba ijezi
IMARITZBURG United isifake isicelo sokuboleka umdlali wekaizer Chiefs osizwa ngendaba isikimu. Ikusasa likawilliam Twala odlala esiswini kwichiefs kuke kwabikwa ukuthi liyacikizela njengoba le kilabhu ifuna ukumdedela.
Lo mdlali selokhu efike kwiChiefs udonsa kanzima ukuthola isikimu ngaphansi kobuholi bukasteve “Mphathi” Komphela.
Leli phephandaba lihoshe ngemithombo yalo ukuthi imaritzburg isisifakile isicelo kwichiefs sokuba ibaboleke lo mdlali.
Kuthiwa into esabambile yimali njengoba kuthiwa imaritzburg ifake isicelo sokuba imholele ur80 000, hhayi lo-r120 000 awuthola kwichiefs zinyanga zonke.
Kuthiwa ichiefs ibizama ukumdayisa ngo-r2,5 million lo mdlali kodwa imaritzburg yanqaba yathi kungcono imuboleke.
Leli phephandaba lishayela ufarook “Ntshebe” Kadodia umnikazi wemaritzburg ngalolu daba uvumile ukuthi uselinde ichiefs ngodaba lukatwala.
“Engingakuqinisekisa wukuthi utwala siyamfuna ngoba sibona engasisiza.
"Imali kanginayo uhola imali enkulu kakhulu kwichiefs engingeke ngikwazi ukumkhokhela yona.
"Ngeke ngikwazi ukuyigagula le mali ngoba yinto emqoka ethinta amakilabhu womabili nomdlali.
"Ngisifakile isicelo kwichiefs nemali engizoba namandla ayo sekukuyona ichiefs ukuthi imisa kanjani kodwa yena siyamdinga,” kusho ukadodia.
Limbuza ukuthi kugcine kwenzakaleni ngokeagan Buchanan wechiefs abebemfuna uthe: “Besingeke sikwazi ukuthatha umuntu ongadlali lo mfana usehlale isikhathi eside ehleli, ngakho-ke besingeke sithenge ingulube esesakeni,” kusho ukadodia.
Ngodaba lukadove Wome osanda kushiya isupersport United ngoba engadlaliswa uthe: “Siyamdinga umdlali wasesiswini ohlaselayo naye uwome siyamfuna inkinga wukuthi uyabiza.
"Kodwa sizobona kahle ngomsombuluko ngicabanga ukuthi okuningi kuzocaca ngawo,” kusho ukadodia.
Ubobby Motaung imenenja jikelele yechiefs, uthi basazoxoxa namakilabhu ehlukene ngodaba oluthinta abadlali abazobadayisa nabazobabolekisa.