ESKHALENI:
KUFANELE inconywe kakhulu isouth African Football Association (Safa) ngokukhombisa ubuholi obuqotho ngokuguqula isinqumo ngokusingathwa komhlangano wokukhetha ubuholi obusha.
Ubuholi bukadanny Jordaan ongumengameli wale nhlangano buphelelwe yisikhathi ngonyaka odlule.
Sithusile isinqumo sokuthi ubuholi obusha buzokhethwa kulo nyaka ngemuva kwemidlalo yendebe yomhlaba ezokuba serussia. Lokhu kwenze kwabukeka sengathi ubuholi bufuna ukuzimelela emandleni.
Abaholi base-afrika bayaziwa ukuthi kabafuni ukuphuma ezikhundleni kwazise kuthiwa bathi imali yasebholeni kayinamnikazi.
Ngemuva kokuba ibafana Bafana ingakwazanga ukuya kwindebe yomhlaba, isafa inqume ukuthi ubanjwe ngokushesha umhlangano wokukhetha ubuholi obusha.
Lo mhlangano uzokuba mhla zingama-24 kundasa (March) kophezulu.
Lesi sinqumo siletha ithemba lokuthi ubuholi obukhona abufuni ukuba buze bududulwe ehhovisi njengoba kwenzekile ku-issa Hayatou wasecameroon obenguMengameli weconfederation of African Football (Caf).
Kungaba kuhle nxa abaholi abagaqede izikhundla bezoyeka umkhuba wokunyundelana nokuzondana.
Umuntu ozokuba ngumengame- li kufanele akuqonde ukuthi ungumholi wazo zonke izifunda kubandakanya nalezo ezingamvotelanga.
Isimo esenzeke kwisafa ethekwini ngemuva kokungamvoteli ujordaan kasithandi ukusibona ngemuva kokhetho lwanonyaka.
Yize bengakaqinisekiswa bonke abagaqede isikhundla kodwa kubukeka umbango uzokuba phakathi kukajordaan nenkosi Mwelo Nonkonyane esiphumele obala ngokuthi isigaqele lesi sikhundla.
Abanye baphakamisa ukuthi lesi sikhundla siphathwe ngulucas Radebe ngoba ulidlalile ibhola, kanti abanye kuthiwa bebenxenxa isinyenyela utokyo Sexwale ongusomabhizinisi.
Usexwale ngeke akwazi ukukhethelwa kulesi sikhundla ngo- ba kudingeka umuntu oseqede iminyaka elishumi esezinhlakeni zebhola.
Abukeka emakhulu amathuba okuthi ujordaan abuyele. Yize kukuningi okonakele ngaphansi kwakhe kodwa kuningi futhi okuhle esikubonile kwenzeka.
Amaqembu esizwe enze kahle njengoba ekwazile ukungenela imiqhudelwano emqoka. Ukwazile nokuguqula isimo sezimali njengoba engene le nhlangano ibhekene nezinkinga zemali.
Ukwazile ukuthungatha abaxhasi nokugcina abebekhona.
Nokho-ke ngeke silikhohlwe iqhaza lakhe ezinkingeni zaseThekwini nakwezinye izifunda nokuthi uke wasolwa ngokudlwengula ujennifer Ferguson obeyilungu lephalamende. Siyethemba ukuthi ubuholi obusha buzosebenzela ukudala ubumbano kwisafa nokuthuthukisa unobhutshuzwayo.
Lo mdlalo kawusathuthuki emazingeni ephansi ngenxa yemibango yezikhundla oqala kumalocal Football Association, ezifundeni, ezifundazweni kuze kuyofika kuzwelonke. Kungaba kuhle ukuthi ikwazulu-natal ilusingathe ngobunono ukhetho lobuholi bayo obusha ukugwema ukuklwebhana.
Okuhle ngekwazulu-natal wukuthi kuheleza umoya wobunye kubaholi bezifunda. Izinkinga zisethekwini kuphela njengoba linezinhlaka ezimbili zobuholi okuyinto ujordaan okungamthatha imizuzu embalwa ukuyilungisa kodwa ulokhu ethalalisa.