Ubheke isicoco seligi upep
Indlela eya empumelelweni izodlula kwiliverpool namuhla
USIHLALO wetottenham Hotspur yase-england uqinisa idolo abalandeli bale kilabhu ukuthi uharry Kane ongumgadli nodale Ali odlala esiswini kabayi ndawo.
Ukane ohamba phambili ngokushaya amagoli e-england kubikwa ukuthi ufunwa uthuli yireal Madrid yasespain, bese u-ali yena akhonjwe kwiparis Saint-germain (PSG) yasefrance.
Laba badlali kubikwa ukuthi bangase bahambe manje njengoba kuvulwe iwindi lokudayiselana ngabadlali.
Udaniel Levy usihlalo wetottenham ushaya phansi ngonyawo uthi laba badlali abayi ndawo.
“Ngifuna ukukuqinisekisa ukuthi laba badlali ngeke bahambe abayi ndawo.
"Sizwile ukuthi kunamakilabhu abafunayo kodwa ngeke nangengozi sibadedele ngisho angeza namalini.
"Asizimisele ngokuhlakaza iqembu lethu njengoba sifuna ukuqeda kwi-top 4, ngakho-ke ngeke sibadedele,” kusho ulevy.
Udanny Rose odlala emuva osesizwa ngendaba isikimu kule kilabhu yena ukhonjwa kwimanchester United.
UPEP Guardiola ocija imanchester City yaseEngland uthi awukho umklomelo ozomjabulisa njengokunqoba isicoco se-english Premiership okokuqala selokhu eqale ukuqeqesha.
Iman City ibhekene neliverpool kowebarclays Premiership namuhla ngesonto ngo-18h00 e-anfield okuyikomkhulu leliverpool.
Iman City iya kulo mdlalo nje, uguardiola umenyezelwe njengomqeqeshi ovelele wenyanga kazibandlela (December) ngoLwesihlanu.
Uharry Kane ongumgadli weTottenham uqokwe njengomdlali ovelele wenyanga kazibandlela.
Uguardiola uthi nakuba lo mklomelo umjabulisile kodwa ugaqele isicoco seligi.
“Ngiyazi ukuthi kwabanye abaqeqeshi umklomelo womuntu ngayedwa ubalulekile kimina awusho lutho kangako okumqoka wukunqoba okuthile ninonke njengekilabhu.
"Njengamanje ngifuna isicoco seligi neman City, iwona mklomelo engiwulangazelele lowo.
"Ngifuna ukuba semlandweni wokunqoba isicoco seligi emazweni amathathu ehlukene ahlo- nishwayo emhlabeni. Ngisinqobile espain nasegermany manje sengigaqele lesi sase-england.
"Ngeke kube lula ngoba sisazobhekana nemidlalo enzima njengalo weliverpool.
"Lo mdlalo uzoba seqophelweni eliphezulu siwulangazelele nabantu ngethemba ukuthi nabo bawubhekile,” kusho uguardiola.
Iliverpool izoya kulo mdlalo ngaphandle kukaphilippe Coutinho wasebrazil ojoyine Bacerlona.
Ujurgen Klopp ocija iliverpool uthi bazomkhumbula lo mdlali kodwa akakholwa wukuthi kuzoba nenkinga njengoba engasekho.
“Akasekho akasekho ayikho into esingayenza, kufanele siqale impilo ngaphandle kwakhe.
"Ungumdlali oseqophelweni eliphezulu kodwa lokho akusho ukuthi iliverpool izowa njengoba engasekho.
"Sizoya kulo mdlalo siphelele sizobe singashodi, ngakho-ke asinavalo lwecity,” kusho uklopp.
* Imidlalo yebarclays Premiership enamuhla ngesonto iqhathwe kanje:
AFC Bournemouth vs Arsenal 15h30.
Liverpool vs Manchester City 18h00.