SIHLAZIYA A AMA-CD
ZIYACOTHOZA ngempela lezi nsizwa, zisacula uhlobo lukacothoza wakudala oqokothisa amagama namaphimbo. Izingoma zihlabahlosile, zixoxa indaba enesifundo. Amaphimbo abo alolongekile.
Ziyi-14 izingoma kule albhamu. Abathandi bomculo wesicathamiya bazobhema bakholwe. Kunengoma eyodwa engeyesi-7 ethakwe ngezinsimbi kamnandi, esingathi iwumbhanso kulabo abathanda umculo ohambisana nezinsimbi. Abayifisayo le albhamu bangaxhumana no-agripa enombolweni ethi 0764641549 noma bathinte umafutha kwethi 0727101878.
INGENISILE Inkunzi Encane, kuzomele ishintshe igama ibe yinkunzi emalunda ngenxa yezinga lomsebenzi wayo ohlabahlosile. Okokuqala nje, izingoma zale nsizwa yasemaMpondweni zidle ngezihlabo ezikuheha kube sengathi ingalokhu iqhubeke njalo. Kuyacaca ukuthi iphekwe nguyise ongumakadebona kulolu hlobo lomculo, Inkunzi Emdaka.
Istudyo eqophe kuso le nsizwa sigqishile, kuthule kuthe du, sikhiphe ulozolo. Ngithathwe yingoma yesithathu esihloko sithi “Akathandi mina”. Nengoma yesi-7 esihloko sithi “Ugologo” inezeluleko kwababulawa ngamahabulo, abahlala bepetukile. Ibuye ikhuze ukuxabana kwabaholi ephalamende.
UMFOKA Shandu uzivezile kule ndima, usahamba ngonyawo lukamasikandi omdala woThwalofu nabanye. Uyakhuluma phakathi nengoma ikakhulukazi engomeni yesibili esihloko sithi “Umndeni” lapho ekhala khona ngezinkinga zemindeni. Nakuba elokhu ephindaphinda imisho ingoma ize iyophela kodwa imnandi nokho. Iyatholakala ezitolo zomculo.