Mayigxile embikweni kamadonsela ikhomishini
ABESEKA umengameli wezwe umnu Jacob Zuma sebemshayele ihlombe, bencoma isinqumo sakhe sokujuba ikhomishini yamajaji ukuba iphenye ngenkohlakalo kuhulumeni nasezinkampanini zombuso ezithinta umndeni wakwaGupta kanye nendodana yakhe unxamalala ududuzani.
Lesi sinqumo sikamsholozi silandela uphenyo olwenziwa ngumvikeli womphakathi osewabeka phansi izintambo, u-adv Thuli Madonsela, owathola ukuthi kunezinsolo zenkohlakalo, wabe esekhipha izincomo zokuthi umengameli Zuma ajube ikhomishini ezoholwa yijaji ukuze ziphenywe kabanzi lezi zinsolo.
Ngenxa yokuthi umnu Zuma uqobo lwakhe uyanukwa kulezi zinsolo zokusetshenziswa budedengu kwamandla ombuso kanye nokwebiwa kwemali yabakhokhi bentela, u-adv Madonsela wanquma ukuba kungabi ngumnu Zuma okhetha ijaji elengamela ikhomishini, kodwa kube yijaji eliphethe enkantolo yomthethosisekelo, uchief Justice Mogoeng Mogoeng.
Sekugcine kwenzekile okwakushiwo nguAdv Madonsela, isekela likachief Justice Mogoeng, umnu Raymond Zondo wajutshwa ukuba engamele le khomishini.
Siyathokoza nathi ngesinqumo sikamengameli, kodwa kubalulekile ukuthi kubekwe obala ukuthi usithathe hhayi ngoba ethanda, kodwa ngenxa yengcindezi enkulu abebhekene nayo. Kuzokhumbuleka ukuthi sekuphele unyaka golokoqo umengameli egqigqa ezinkantolo, esebenzisa imali yabakhokhintela, ezama ukuvimba ukuba le khomishini iqokwe, ukuze ukwazi ukuqala umsebenzi.
Yonke le mizamo yakhe yokuhudula izinyawo yehlulekile, izinkantolo zimchitha. Umnu Zuma ubeshayisana ngisho neqembu elibusayo okade elihola, i-african National Congress (ANC), lona ebelifuna le khomishini ikuba iqokwe ngokushesha ukuze iqale uphenyo.
Sethemba ukuthi manje ngeke esaqhamuka nokubeka ezinye izihibe ukukhubaza ukuqala komsebenzi wekhomishini. Sekunemibiko enganiki ithemba, eqhamuka kubalandeli bakhe umnu Zuma, ekhuthaza ukuba ikhomishini ingabheki nje inkohlakalo asolwa ngayo umengameli nabangani bakhe, kodwa iphenye neminye imibiko yenkohlakalo okuthiwa yenzeka ngesikhathi sobandlululo.
Uma lokhu okushiwoyo kungaba yiqiniso kungabe kuyimizamo yokukhohlisa abantu nokudukisa ikhomishini ukuze ingakwazi ukwenza umsebenzi wayo.
Okufanele kugqame wukuthi le khomishini imayelana nenkohlakalo ethinta abantu abasondelene nomnu Zuma naye uqobo. Ayigxile ekuphenyeni lolu daba, hhayi okunye okuhloswe ngakho ukwedukisa abantu baseNingizimu Afrika.
Uma umnu Zuma nabalandeli bakhe befisa ukuba kuphenywe ngenkohlakalo eyenzeka ngesikhathi sobandlululo, unelungelo lokuqoka enye ikhomishini ukuba yenze lowo msebenzi, kasinankinga ngalokho.