Makanikezwe ithuba umntwana wakwaphindangene
MHLELI, sekuyiminyaka isikhungo sokulondoloza amagugu enkosi Luthuli siba nesithulo-sifundo ngenkosi Albert Luthuli.
Ngiyafisa nokho ukwazisa izwe lakithi ikakhululazi intsha cishe engazi lutho ngokuthi nomntwana Mangosuthu Buthelezi uyazana nenkosi Luthuli eyayingumengameli kakhongolose.
Ngaphambi kokudlula emhlabeni kwenkosi Luthuli, yayihambela izimbizo zesizwe Kwanongoma njengenkosi yesizwe sasemakholweni.
Ngale kwalokhu yayifika Kwaphindangene ngisho isivalwe umlomo.
Emini yayilala, ivuke ebusuku baxoxe izindaba ezishisa uphondo zomzabalazo wenkululeko yezwe lakithi.
Ngenxa yokuthi ukuhamba kwayo kwase kuqashwe ngeso lokhozi wuhulumeni wobandlululo, imoto yayo yayifihlwa egalaji emzini kashenge.
Ngesikhathi ushenge ebhekene nenselelo enzima ekuthatheni ubukhosi esikhundleni sokuqhubeka nomsebenzi wakhe awufundela wokuba ngummeli, inkosi Luthuli yamkhuthaza ukuba athathe ubukhosi.
Lokhu kwagcizelelwa nangumnu Oliver Tambo owathumela umnu Cleopas Nsibande ukuba baluleke ushenge ukuba asithathe isikhu- ndla sokuba ngundunankulu kuhulumeni wakwazulu omdala.
Nayo inkosi Luthuli yake yabhekana nenselelo yokukhetha phakathi kokuba yinkosi yasemaKholweni nokuba ngumholi wezombusazwe, kepha yakuthatha kokubili.
Abanye abazi ukuthi ngesikhathi ifihlwa inkosi Luthuli, ubuholi bukakhongolose obabusekudingisweni bacela ushenge ukuba athule inkulumo yokuyiphelezela.
Yilapho wathi uma eqeda ushenge wakhipha ifulegi LE-ANC (African National Congress), wamboza ibhokisi layo inkosi Luthuli.
Mude umlando kashenge ngeNkosi Luthuli, nomndeni wayo uyazazi lezi zinto.
Benkungaba kuhle ngelinye ilanga ukuba abahlela lezi zifundo zethulo ezihlonipha inkosi Luthuli bameme noshenge.
Bayobe abamqhoshisi futhi abambeki endaweni engamfanele kepha lokho kuyokhombisa ukuvuthwa kwezombusazwe nokuhlinzeka intsha ngethuba lokuba yazi zonke izinhlangothi.
Akamenywe ushenge ayokwethula inkulumo ngenkosi Luthuli.
Mathapello Nkadimeng Mhlongo Street, THOKOZA 1426