ABACULI BASETHEKWINI EMBANGWENI WENGOMA

SEKUQUBUKE impi eshubile phakathi kosaziwayo basethekwini ababanga ingoma.

UDJ Boonu ogama lakhe langempela ngu-andile Chili, usola umculi utdkmacassette, onguthandeka Mkhwanazi, ngokuthi webe izinhlavu ezisengomeni yakhe eshise izikhotha esihloko sithi Uswidi Wodwa.

ILANGA Langesonto lithole lezi zindaba emithonjeni yalo, eveze ukuthi uboonu udinwe uyaveva, ucikwa wukuthi engomeni KATDK esihloko sithi “Walk yephara” kunezinhlamvu ezithi “uswidi wodwa lo”.

Ekhuluma naleli phephandaba uboonu akakufihlanga neze ukucasuka kwakhe, ubezwakala nasocingweni ukuthi udinwe uyafa.

“Ngike ngambona

UTDK kodwa ngangakwazi ukukhuluma naye ngoba nginqene ukuthi uma ngimkhulumisa uzosuke akhulume into ezongicasula bese ngenza into engizozisola ngayo,” kusho UDJ Boonu.

Uthe kufanele ayeke ukukopela UTDK.

“Ukuze abantu bezomthanda UTDK, kumele asebenzise ithalente lakhe, ayeke ukukopela.

"Bazomthanda kanjani abantu uma ezofuna ukuduma ngento evele isidumile,” kuqhuba uboonu.

Uqhube wathi kumele aye esikoleni sokufundela umculo ukuze ezozazi kahle lezi zinto zomculo.

“Kusho ukuthi njengoba ngizokhipha enye ingoma nje, uzophinda akopele?” kuqhuba uboonu.

Ethintwa UTDK ngalolu daba uthe akantshontshanga ngoma yena ubezisholo into emnandi nje eshiwo yiwona wonke umuntu.

“Bekumele ngithini uma into imnandi? Kusho ukuthi ubefuna ngithi upelepele? Ngeke phela, into emnandi wuswidi,” kuchaza UTDK.

Ephawula mayelana nokuthi kufanele aye esikoleni ayofundela umculo uthe: “Mina ngifunde kakhulu ukudlula lokhu komculo-ke - ngenze ipublic Relations and Business Manangement. Empeleni yimina ongaphatha uboonu, engangitsheli ngesikole yena,” kuchaza UTDK.

Ugcizelele ukuthi azifani izihloko zezingoma kodwa into efanayo yizinhlamvu engomeni kuphela.

Ngemuva kwesikhashana UTDK uphinde wafonela intatheli eyisola ngokuthi yiyona emqhatha noboonu.

makhoba@ilanganews.co.za