"Umsholozi yindoda enesineke esikhulu"
Ube nobudlelwane obukhethekile nozuma
ONGAKUQONDI kahle ukusebenza kwabezindaba ubengafunga agomele ze ashaye phansi ngonyawo ukuthi intatheli YESABC, umnu Mzwandile Mbeje, ibisebenza ehhovisi lalowo obengumengameli wezwe umnu Jacob Zuma njengoba kunguye obebika mihla ngezithinta ihhovisi likamengameli.
Uhambele inqwaba yamazwe abevakashelwa ngumnu Zuma nobekungenza ungamsoli ocabanga ukuthi impela umnu Mbeje usebenza kuleli hhovisi kanti cha, uqashwe YISABC.
Yinto ejwayelekile kulo mkhakha ukuthi kube nethimba nje elilandela ezenzeka ehhovisi lika- wezi-2009. Umnu Mbeje ujutshwe kuleli thimba ngonhlangulana (June) walowo nyaka kuze kube namuhla. Enkulumweni ekhethekile NELANGA
Langesonto kuningi akuvezile kobekwenzeka ngale kwamakhamera kanti okunye silindele ukukuthola encwadini ayibhalile azoyikhipha maduze azobe elanda kuyo ngokusebenza kwakhe nomnu Zuma.
Umbeje uhleka aze aqethuke kwazisholo uvusi Ximba uma exoxa ngamahlaya nezinto ebezike zishiwo ngumnu Zuma uma bekwamanye amazwe.
AMANCOKO KAMNU ZUMA
“Yazi uma sihambele amazwe afana nomozambique, Angola ubevele aqhamuke esesibingelela ngesiputukezi njengoba kuwulimu abelukhuluma. Kuzothi uma ebona ukuthi kuduma upotiyane ngakithi bese ebuza ukuthi sike sazixaka yini kodwa ngokuphumela emnyango sabona abantu noma sifike sazivalela ehhotela. Uhleko lwakhe ubuluzwa lapho esethi ukuba besike saphuma engabe sesiyakwazi noma ukubingelela nje. Ubenamancoko, kwesinye isikhathi aze athi kunjalo-ke ukungabi ngamagagu okukhuluma uma sithi besingakaze siphumele ngaphandle noma singene ngaphakathi lapho besingahlangana khona nabantu. Mina nje njengoba ngidabuka enquthu yena esuka enkandla ubeke angibuze esithubeni ukuthi ngigcine nini ekhaya, bese ehleka uma kuwukuthi sekuyisikhashana, ekhala ngokubhunguka. Ubengibuza nangezinkomo zami ukuthi ngizigcine nini nokuyizinto ebezingahlangene nhlobo nomsebenzi,” kwenaba umnu Mbeje ngamahlaya kamsholozi (okuyisithakazelo sakwazuma).
OBEKUMCASULA KAKHULU
“Engikunothisile wukuthi bekumcasula ukusabalala kwezindaba ezingelona iqiniso (fake news) ngeningizimu Africa noma ngaye uqobo ngoba ubezinikele cishe impilo yakhe yonke esebenzela leli lizwe. Izinto ezibikwe ngabezindaba zingcolisa izwe bezimphatha kabi kangangokuthi ubengakhohlwa wukuthi ngesikhathi ehambele emexico, bamtshela bona ukuthi bayalivikela elabo izwe ngokungasabalalisi izindaba ezimbi noma ezingelona iqiniso,” kulanda umnu Mbeje.
UBEKITAZWA YINI?
“Ungumuntu obathanda kakhulu abantu. Ubethokoza uma izinto zihamba kahle njengokuphasa kangcono kukamatikuletsheni, ukuthuthuka kwezempilo, nokwenza kahle kwerandi. Uyindoda ebikumangaza ngempela njengoba ezifela ngomasikandi. Bekuhlula noma ebhala elungiselela inkulumo efana nestate Of Nation Adress (SONA), ubumthola elalele wona. Ubekumangaza ngempela ngokuba yindoda ezithandela izinto ezithathwa njengezabantukazana,” kuqhubeka umnu Mbeje.
UBENGACASUKI NA NOMA NINODWA?
“Unesineke ongeke wakwazi ukusiqonda umnu Zuma. Kumthatha isikhathi eside ukukhombisa ukudinwa kwakhe kodwa uma sekusekugcineni avele athi GAH! Bekwehlula noma kukhona abambiza ngenja kodwa avele athi inkinga ngeyalo ombona eyinja ngoba yena akayona. Ubengusomaqhinga nokuyikho okumenza akwazi ukubekezela kangaka - yingakho nje engumdlali we-chess,” kusho umnu Mbeje kuzwakala ukuthi uchazeke ufile.
Uthi maduze uzokhipha incwadi echaza ngokumazi kwakhe umnu Zuma. Uthi bese bekulungele ukuyikhipha ngonyaka odlule kodwa babuye bavumelana nethimba asebenza nalo ukuthi bayidedele uma sekuphela isikhathi sikazuma ngowezi-2019 kanti kababuzanga elangeni njengoba lo nyaka ungezomfica esikhundlani uzuma.
Uthi okwenzekile sekuzophoqa ukuba babuyekeze izinhlelo zabo. Mayelana nokuqhubeka esebenza eduze kukamengameli wezwe, uthi okwamanje akakabi nalwazi ngokuzokwenzeka kodwa kuzoba yisinqumo somqashi (SABC) ukuthi liyashintshwa na ithimba noma uyaqhubeka nokuba yi-presidential Correspondent.