Inkonzo yomkhuleko ekhethekile
ABAZALWANE bamabandla ahlukene basethekwini namaphethelo bebenenkonzo ekhethekile yomkhuleko isimemo sayo esize nomphrofethikazi Zandile Mazwi okhonza phansi kukamfu Ndabenhle Khwela ongumholi wekingdom Community Prayer Centre.
Yinkonzo lena ebimnandi ngoba ingenamicikilisho kodwa zisha ngezwi lenkosi nomthandazo kuphela, nokuyikho obekuhlangenwe ngakho. Bekumnandi ukubona uhlelo lonke lusezandleni zabesifazane, imvamisa abanesipho sokuphrofetha.
Abefundisi besilisa abebelapho bebewusekele umbono wale nkonzo unkulunkulu abewembule kumphrofethikazi Zandile Mazwi, nakuba esemncane kakhulu ngeminyaka yokuzalwa.
Izwi lenkosi lethulwe nguMphrofethikazi Nontobeko Ndlovu kamuva kwaba ngumyeni wakhe umphostoli Sihle Ndlovu basembali, epietermaritzburg lapho behola khona ibandla i-christ Tabernacle.
Isifundo sentshumayelo kaMphrofethikazi Ndlovu besithathwe encwadini I Ekapetru 2:9 lapho kuthi khona “kepha nina niluhlanga olukhethiweyo, ubupristi obobukhosi, isizwe esingcwele, abantu abazuziweyo, ukuze nishumayele ubukhosi balowo owanibiza niphume ebumnyameni, ningene ekukhanyeni kwakhe okumangalisayo”.
Esechaza umyalezo wakhe uyiqale emuva indaba lapho ethe empeleni ubuphristi buka-aaron babungaphandle njengoba bekubonakala ngezivatho kanti lobu esibizelwe kubona lesi sizukulwane ngobangaphakathi.
Uchaze ngesiqalo salobu phristi obusha okube mhla kubhabhathizwa ujesu Kristu, nokulapho kwenzeka ingqayizivele yokuhlangana kobuthathu bukankulunkulu bafakazelwa ngasikhathi sinye: indodana ujesu owabe ebhabhathizwa, nokuvuleka kwezulu kwehle umoya ongcwele eyisimo sejuba weza phezu kwakhe, kanye nephimbo elezwakala ezulwini lithi “Lo uyindodana yami ethandekayo engithokozile ngayo”.
Ugcizelele ukubaluleka kokuba ibandla liphelele enkonzweni yobuphristi obuhlangene kujesu Kristu. Wathi manje sesifikile isikhathi semvuselelo enkulu okumele ihambisane nezimangaliso. Ngaphambi kokuba kungene umphostoli Ndlovu kube nomculo ohlabahlosile kankz Londiwe Cele wodumo lwe Joyous Celebration oshaye umucu owodwa katimothy Myeni wencandweni Christ Ambassadors osihloko sithi “Uyalalelwa unkulunkulu”.
Umyalezo wesibili kamphostoli Sihle Ndlovu ubugxile ezikhathini zokugcina. Uqale ngokubonga izinceku ezihola amabandla ahlukene ebezifike ngobuningi bazo, etusa ukuthi lokhu kuhle ikakhulukazi kulezi zinsuku lapho ukux- hasa umyalezo wobumbano kungasukunyelwa phezulu. Ubevule Izwi lenkosi encwadini Ekajakobe 5:7, wawunika isihloko esithi ngolwasemzini “Preparing The Church For The Glory of The Last Days”.
Kuningi okuvule amehlo kubazalwane, ethinta nezimpawu okuyobonakala ngazo umnyakazo wezikhathi zokugcina.
Phakathi kokunye akushilo yilokhu:
kuyobuya ukumesaba unkulunkulu;
siyobona kuba nomoya wokwazi;
kuyoba nomoya wokuhlakanipha, izinceku zikwazi ukuchaza umnyakazo kajehova;
kuyoba nokuluqonda kangcono uthando lukankulunkulu;
kuyoba namandla okwenza izibonakaliso.
Inkonzo iphethwe ngokuthandazela abazalwane ezidingweni zabo ezahlukene.
bonginkosi@ilanganews.co.za