SIVULA AMEHLO ABACULI:
SIKHUMBUZA abaculi bowokholo ukuthi unkulunkulu akezwani nabantu abamthatha kancane, abafuna ukumenza umpompi wamanzi wona ofike uwuvule uphuze amanzi bese uyawuvala uwushiye, ubuye mzukwana usuwomile futhi.
Umculo wokholo udinga ukuba ulandele yonke imigudu yezenkolo uze uzuze nogcobo kuthi uma uqala ukuwucula, umuntu azibone esekwelikapawula izulu lesithathu.
Sithi asibakhumbuze abaculi abaningi asebenesikhathi becula lolu hlobo lomculo ukuthi uma benza imikhuba ephambene nento abayiculayo, basuke bezicekela phansi - ngisho umuntu angaze abe nephimbo elimtoti kangakanani.
Abanye bazibona bengaphumeleli baze bacabange ukuthi bayazondwa noma badicilelwa phansi yizinkampani zabo ezingawusabalalisi kahle umsebenzi wabo, kanti yindlela abaziphethe ngayo. Abanye baze bathuke ophrojusa babo bethi abawenzi kahle umsebenzi.
Baningi abaculi abafike bacule kahle, izingoma zabo zidlalwe emisakazweni nakomabonakude, balindele ukuthi bazothengwa kodwa kube yibo kanye abavimba abantu ukuba bayothenga umculo wabo ngezenzo zabo ezinjengokusebenzisa izidakamizwa, inhlamba, ubugebengu, njalonjalo.
Abanye abaculi bathi beqeda ukucula kahle, bebusisa abantu ngezwi likankulunkulu, baphume lapho bayodlonya utshwala, baphafuze ugwayi kumbe insangu, abantu bajabhe nje. Umculo wokholo ufuna umuntu axhumane nojehova ngokujulile, azincengele kuye amcele ukuba amhole ngoba wumculo wakhe lona.
Sekukhona abaculi okuthi noma kukhona lapho kushonwe khona kumele baye bayoduduza bagoloze ngoba befuna inkokhelo, bakhohlwe wukuthi ukuzinikela kuzobanika umvuzo wokuthi kulowo muzi bathole abalandeli abasha.
Nazi ezinye zezinto okumele umculi we-gospel aziqaphele:
Akazihloniphe noma yikuphi lapho ehamba khona.
Akawaqaphele amagama awashoyo emphakathini. Akaliqonde kahle izwi lenkosi. Akabe ngokwaziyo ukuthandaza.
Kuhle azijwayeze ukubingelela ngendlela yabazalwane, angadavuzi nje.
Angazikhukhumezi kodwa akaphakamise udumo lukajehova.
Uma ebuzwa ngabezindaba kumele ayazi into ayishoyo.
Ukunyakaza kwakhe akuqoqeke, angafequzi.
Indlela agqoka ngayo ayehluke kulena okugqoka ngayo abaculi bezinye izinhlobo zomculo.
Uma umculi ekhiphe i-albhamu akazame ukuba okungenani ithole izibusiso kumfundisi wakhe noma esontweni.
Siyethemba abaculi abanezindlebe bazolalela, benze, babone nomehluko ekudayisweni komculo wabo njengoba kuzothi uma beyethula i-albhamu yabo emakholweni aphawule ngayo, amtshele uma ilalisa ubuthongo, ingazithinti izinhliziyo.
knowledge.simelane@ilanganews.co.za