MAYINGAPHINDWA YINDUKU EYODWA I-IFP
MHLELI, ngivumele ngisike elijikayo, ngiqwashise inkatha Freedom Party (IFP) kule ngozi elengela kuyo.
Ngikhathazwa wukuyibona ithatha isitayela SE-ANC.
Kuyiqiniso elingephikwe ukuthi ukhongolose unezinkinga owazifaka wona kuzo ngesikhathi sokukhethwa kwabazoyimela okhethweni. Akukuhle ukufunzwa kwabantu, ngabantu okumele babamele okhethweni.
Kuzobe kunokhetho lokuchibiyela ku-ward 02 Obonjeni.
Kuyiqiniso ukuthi I-IFP yadliwa okokuqala kulesi sigceme okhethweni lohulumeni basekhaya olwalungowezi-2016.
Ngiyakholelwa ekutheni I-IFP yalahlekelwa yilesi sigceme ngoba yahluleka wukukhetha umuntu owayefunwa ngabantu.
Nakulolu khetho ngiyabona ukuthi ingahle iphindwe yinduku eyodwa ngoba kubukeka iphambana nokufunwa ngabantu ekukhethweni kozoyimela kulolu khetho lokuchibiyela.
Ngingakuqinisekisa ukuthi kade kwaqala ukubekwa kwamakhansela kule ndawo yakithi (Obonjeni).
Wonke abephuma asishiye singenalutho. Abelokhu esithembisa ubala. Siqale ngowezi-2011 kuya kowezi-2016 ukubona umehluko.
Ngaleso sikhathi ikhansela bekungumnu Jabulani Buthelezi. Akekho owayazi ukuthi ubombo lungahle lukhanye (ugesi), kodwa ngaye luyakhanya.
Waphuma esesethulele namanye ama-projekthi kagesi, nangempela siwabonile enzeka nakwezinye izindawo kule ward noma yena engasekho esikhundleni.
Ukwazile ukwenza okuhle esikubonile. Nangendlela ayenza ngayo uma kunamathuba emisebenzi ubesenelisa sonke, wayengabheki abeqembu lakhe.
Noma ekhuluma nathi wayesishiya sanelisekile. Sadumala uma I-IFP ingasambuyiseli, sasinethemba lokuthi izomnika ihlandla lesibili. Kuyiqiniso ukuthi sagqemeka engeqiwa ntwala uma engabuyeli.
Namanje ngiyabona ukuthi kulolu khetho lokuchibiyela I-IFP ingahle ikhale ngaphansi okwetshebe yangoba sibona abantu abaningi esingabazi ngisho enkatheni kodwa abafuna ukukhethwa, bavotelwe.
I-IFP kuyomele iyibuke ngelinye iso le nto ngoba uma kungenjalo kuzoyiphinda okwayehlela ngowezi-2016.
Okhathazekile Obonjeni, Ward 02