Ngabe ubuyela emuva yini umsholozi?
Abebengomengameli BE-ANC bayaqhubeka babe ngamalungu ENEC
UKUVUNGAMA okubikwa ukuthi kuyezwakala emagatsheni kakhongolose Kwazulu-natal, kuletha umbuzo kwabanye othi ingabe lokhu kuyinkomba yokuthi ubuyela emuva yini ngokwepolitiki umnu Jacob Zuma?
Imibiko yabezindaba yakamuva ithi amalungu esigungu esiphezulu, inational Executive Committee (NEC), abekade ehambela izindawo ezahlukene ukuyochazela amalungu ale nhlangano ngesinqumo SENEC, ahlangane nezimbila zithutha ziholwa ngemhlophe phambili njengoba abanye abaholi bamaziko bebephinda wona kanye lowo mbuzo obubuzwa ngumnu Jacob Zuma engakesuli esikhundleni, wokuthi yini ebiphuthunywa ngokumsusa esikhundleni sokuba ngumengameli waleli zwe.
Nakuba labo abathukuthele ngesinqumo SENEC bethi ngokwenqubo bayameseka umnu Cyril Ramaphosa kwesokuba ngumengameli, kodwa bakhala ngokuthi ukukhishwa esikhundleni kukamnu Jacob Zuma kukhombisa ukuqhubeka koqhekeko lwaseNasrec.
Okuyindida nokho wukuthi njengoba emazwini okubeka phansi izintambo, umnu Zuma wathi makungabi khona uqhekeko embuthweni kakhongolose ngenxa yegama lakhe. Pho lezi zikhalo kukuphi lapho zibheke khona? Wona lowo mcimbi wokumemukela esifundazweni sasekhaya ingabe ngowokuhlola izinga lokwesekwa kukamnu Zuma?
Lapho ILANGA lithintana noprof Bongile Mayaba, oke wasebenza enyuvesi yakwazulu-natal, uthe kunzima ukusho ukuthi le nqola ibhekephi. Usike elijikayo ngokuthi le NEC abathile abakhala ngesinqumo sayo, yakhethwa ngokuvulelekile lapho NEKZN yayimelwe khona.
Okunye le NEC inikezwa wumthethosisekelo wayo I-ANC igunya lokwenza izinqumo uma ingqungquthela ingeke ikwazi ukuhlangana. Manje kuyindida ukuthi sekufuneka inikeze izizathu ngaleso sinqumo kanti phela noma yiliphi ilungu lombutho liyafana nesosha elijutshiwe okumele lilalele abaphathi balo.
Kunjalo nje yena umnu Zuma ubekusho ukuthi njenge- cadre uyozithobela izinqumo ZENEC. Okwesithathu le NEC ibivumelana ngalesi sinqumo. Impikiswano ibingokuthi ukuhoxiswa kukamnu Zuma kumele kwenziwe nini, kwazise nomnu Zuma ebecela ukuba anikwe ithuba eliyizinyanga ezintathu.
Wayesephetha ngokuthi maqondana namahlebezi okuthi okhethweni lwangonyaka ozayo, kunabathile abathi bazobe befolosa ngaye umsholozi, lokho kukushiya nombuzo othi njengoba sekwaba yisiko ukuthi uma ukhongolose ukhankasela ukhetho namanye amaqembu, ilungu eliwubuso beANC nelihola umkhankaso, kuba ngumengameli WE-ANC, nokuthi uma belunqoba ukhetho abe ngumengameli wezwe, umnu Zuma lizobe liyini iqhaza lakhe?
Nokuthi abalandeli kumele beseke muphi umholi? Ngeke yini lokho kuvule igebe loqhekeko ingqungquthela ebizama ukuluvala? ILANGA like laxhumana nonkz Nonhle Mkhulisi ongusihlalo weMusa Dladla Region enhlanganweni kakhongolose. Unkz Mkhulisi uyididiyele impendulo yemibuzo ngokuqala ngokuthi kufanele abantu bangabi nakho ukudideka ngeqhaza likamnu Zuma I-ANC emnikeza lona.
Waqhubeka wathi umnu Zuma njengesosha lomzabalazo, inhlangano kakhongolose ikubone kuwukungahlakaniphi ukuba ingalusebenzisi ulwazi analo kwezombusazwe. Ngakho-ke lapha esifundeni sasekhaya kuzomele bamsebenzise.
“Futhi-ke ngokwenqubo yenhlangano, ubuholi obuphezulu bunikeza inhlangano emazingeni onke uhlelo oluzolandelwa lokusebenza. Kulolo hlelo akukho kudideka ngokuthi kuzobe kungubani umengameli wenhlangano njengoba bekwamukelile ukuthi umnu Ramaphosa nguyena ongumengameli kakhongolose,” kusho yena.
Washo nokuthi empeleni bonke abebekade bengomengameli bakakhongolose bayaqhubeka babe ngamalungu ENEC. “Kunjalo nakumnu Zuma, ngakho abantu mabangadideki” kuphetha unkz Mkhulisi.
IZINKUNDLA ZOKUXHUMANA
Njengoba bekulindelekile, nezinkundla zokuxhumana azisalanga ngaphandle kule ndaba njengoba kukuningi okushiwo ngabantu kuyona. Abanye baphawule kanje:
mazulu, uzuma akukho avelele ngakho (Zuma is not special zulus) - Joel Nkadimeng
Umbeki wabuyiswa, akekho owake wafuna incazelo, pho kungani manje? - Thobs
Ingabe abalandeli BE-ANC bayizithutha kangangoba badinga ukuchazelwa izizathu zokubuyiswa kukazuma? - Prometheus
Ngakho NENPA kuzomele kuqala ibonisane NEKZN ngaphambi kokuba ishushise? - Johan58
Ewu! Kuphakathi kokuthi abaluboni ubonda noma abakwazi ukufunda. - Prince Valiant