ESKHALENI:
UKUDLA ubhedu ihlandla lesibili kwelamontville Golden Arrows emidlalweni yemultiChoice Diski Challenge (MDC) kusidweba sigqame isithombe sokuqina kwezinhlaka zokuthuthukiswa kwabadlali kule kilabhu eholwa ngumato Madlala.
I-arrows Reserves izothweswa umqhwele wokuba yizingqwele ezintsha ZEMDC namuhla ngesonto ngemuva kokubhekana nebidvest Wits Reserves eking Zwelithini Stadium, emlazi.
I-arrows isabambelele ezimfundisweni zikamandla “Rocky” Madlala (ongasekho) obekholelwa ekuvundululeni ikhono alipholishe bese ebhubhisa amakilabhu ngabadlali abasebancane ikakhulukazi abadabuka khona KwaZulu-natal.
Kubuhlungu-ke nokho ngoba ukuntula abaxhasi kwenza le kilabhu ilahlekelwe wukhilimu wabadlali abayengwa ngezindodla zemali ngamakilabhu anabaxhasi.
Sikhuluma nje, i-arrows kayinabo abaxhasi okungenye yezinto ezenza idonse kanzima kwipremier Soccer League (PSL).
Ngesikhathi le kilabhu inqoba IMTN 8 ngonyaka wezi-2009 ilolongwa ngumanqoba “TV” Mngqithi, ibixhaswe ngabakwamtn abangasekho kuyona.
Umato sekukaningi ekucacisa ukuthi kunzima ukugcina abadlali ngoba ikilabhu intula abaxhasi.
Lokhu akwamukelekile ngoba baningi osozigidi ethekwini namaphethelo abangakwazi ukulekelela le kilabhu ukuze ikwazi ukulwela izinkomishi kwipsl.
Baningi abadlali okungabe kukhulunywa okunye nge-arrows ukuba yakwazi ukubagcina, kabazange bayishiye bevutha bhe.
Kubona kungabalwa nje ubheka Phakathi, Papi “Ginger” Zothwane, Mabhudi “Lion” Khenyeza, Thamsanqa “Gandaganda” Gabuza, Njabulo “Mvonqo” Manqana, urichard nojoseph Henyekane (abangasekho), umlungisi Gumbi nabanye kwabakamuva.
Usiyanda “Jojo” Zwane nobongi Ntuli bekucaca ukuhamba kwabo ngoba ikilabhu ibisidliwe yizembe kwi-absa Premiership izama ukwenza imali yokubuyela esigabeni esikhulu nebala yahlala isizini eyodwa kwinational First Division wayibuyisa ushaun Bartlett obeyicija.
Ukubambisana kwabaqeqeshi bezikwati ze-arrows akungatshazwa ukuthi yikhona okulethe inkomishi YEMDC. Abadlali aba- ningi asebewumgogodla wesikwati esikhulu sale kilabhu bebeyingxenye yesikwati SEMDC esidle ubhedu kumasizini ambalwa edlule.
Ukujima ndawonye kwezikwati ze-arrows kwenza izinto zibe lula kuclinton Larsen oyinhloko yabaqeqeshi kule kilabhu. Muva nje usanda kubophela okokuqala emdlalweni wepremiership usiboniso Conco wadlala ingcwenga yebhola le kilabhu ihlulwa yiKaizer Chiefs kungabonakali ukuthi udlala okokuqala ngqa kwiPremiership.
Kungaba kuhle ukubona osomabhizinisi abazimele beseka izinhlaka zokuthuthukiswa kwabadlali be-arrows ngoba sekukaningi ikhombisa ukuthi iwumthombo ongashi ngisho kuhlasele isomiso ekukhiqizweni kolozolo lwabadlali.
Okuhle ngezinhlaka zokuthuthukiswa kwabadlali kwi-arrows wukuthi zididiyele abadlali abavela ezindaweni ezahlukene zaKwazulu-natal.
Lokhu-ke kuphonsela inselelo ngisho osomabhizinisi okungebona abasethekwini yokweseka izinhlaka zale kilabhu kwazise kumba eqolo ukukhulisa umdlali.
Nohulumeni wesifundazwe akekho engibona engawugxeka nxa usiza izinhlaka ezincane zeArrows ngoba ifana nesikhungo sokuthuthukiswa kwabadlali esifundazweni. Lokhu kubonwa nayingane ekhasayo kusuka phakathi elamontville lapho ivumbulule khona unduduzo “Sulu” Sibiya obuye adlala kwimdc nasesikimini esikhulu nosibusiso Sibeko ukukha nje phezulu kwabadabuka kuleli lokishi okuzalwa kulona abanikazi bale kilabhu.