UFANISWA NEZINGWAZI OWE-TOTTENHAM
UFANISWA nezinkakha kunobhutshuzwayo umousa Dembele waseBelgium ogijima kwitottenham Hotspur eqhathwe necrystal Palace kowe-english Premiership namuhla ngesonto ngo-14h00, elondon, e-england.
Umauricio Pochettino ongumqeqeshi wetottenham, uthi ibhola elidlalwa ngudembele liyefana nelikadiego Maradona wodumo kwi-argentina.
Lo mqeqeshi uthi udembele ulinyuse kakhulu izinga okwenza abe nethemba lokubuya namaphuzu emdlalweni wanamuhla.
“Sengiphumele kaningi obala ngithi udembele uzobanjwa kude. Mina ngimubona edlala leli bhola ebesilibona kumaradona. Ngale kwalokhu, ngimubeka ezingeni lezingwazi engidlale nazo engingabala kuzona uronaldinho, uyena umaradona nojay-jay Okocha,” kusho lo mqeqeshi wase-argentina.
Itottenham izokuya nesikwati esiqinile kulo mdlalo njengoba kungutoby Alderweireld kuphela ongatshazwayo ngemuva kokuthinteka ejimini ngolwesine. Utoby ungumkhaya kadembele, kanti kubhekwe lukhulu kubona njengoba benomthwalo wokusiza ibelgium ukwenza kahle emidlalweni yendebe yomhlaba ezokuba phakathi nonyaka erussia.
Ipalace isemizamweni yokuvula igebe phakathi kwayo namaki-labhu avika izembe.
Ilinyalelwe yinqwaba yabadlali okwenza idonse kanzima. Le kilabhu ilinyalelwe ngabadlali abali12.
Nokho uroy Hodgson ololonga ipalace uthi ngeke avike ngabadlali abalimele.
Uthi laba abakhona kumele benze umsebenzi.
Uhodgson unobuhlobo obuhle nopochettino ababukhande ngesikhathi uhodgson esalolonga i-england.
Bekuba lula ukuthola abadlali betottenham njengoba bezwana kakhulu. Itottenham ihlule ipalace ngo-1-0 ewembley Stadium ngozibandlela (December) nyakenye. Ngaleso sikhathi uhodgson ubesanda kufika ezama ukukhipha le kilabhu engozini yezembe. Ufike kuyona ezovala isikhala sikafrank de Boer.