I-PIRATES IBALISA NGOKULIMALA KWABADLALI
UMILUTIN “Micho” Sredojevic ongumqeqeshi we-orlando Pirates ubalisa ngosizi oluhlasele le kilabhu akhala ngokuthi lungase luphazamise umgqigqo omuhle ehamba ngawo kulezi zinsuku.
Ibucs izobhekana nechippa United kowe-absa Premiership namuhla ngesonto ngo-15h30 enelson Mandela Bay Stadium, ebhayi.
Ibucs iya kulo mdlalo nje, isimo sinzima ekhempini yayo njengoba kulimele abadlali ebithembe ukubhubhisa ngabo izimbangi.
Uthabiso Kutumela no-augustine Mulenga osanda kusayiniswa ngeke babe khona kulo mdlalo njengoba belimale ejimini ngeledlule.
Usredojevic ubalisa ngosizi lokulahlekelwa yilaba badlali abebheke lukhulu kubona njengoba seyishubile imidlalo yeligi kwazise amakilabhu alwela ukunqoba isicoco kanti amanye azama ukubalekela izembe.
“Ukutumela ubesengenile egiyeni, ubesenza izinto zenzeke ekilabhini. Sishayekile ngokulimala kwakhe ngoba uwuhlupho ezitobheni kaziphumuli. Nothabo Qalinge kube ngesifanayo elimala esesefomini. Umulenga besibheke ukuba aqale (umdlalo) ukuze abalandeli babone ukuthi uza nani naye wavele walimala.
“Nokho kangifuni kube sengathi ngifuna into yokuvika, umdlalo wechippa sizokuya kuwona siwuhlomele.
"Ngeke ube lula kodwa nginethemba lokuthi sizowunqoba,” kusho usredojevic.
Utebogo “Tebza” Moloi ocija ichippa, uthi ngeke nangengozi akufake ekhanda ukuthi uyazi njengoba ezazi ibucs kwazise usebenze isikhathi eside kuyona engumdlali wabuye waba sethimbeni labaqeqeshi bayo, eyisekela.
“Lo mdlalo ngiwuthatha njengeminye, akukho nakancane ukuthi ngikhulele kuyona ipirates. Phela ngikwichippa manje ngisebenza kuyo.
"Okungijabulisayo ngalo mdlalo wukuthi sisekhaya. Silindele abalandeli ukuba baphume ngezinkani ukuzoseseka.
"Esingeke sikuvumele wukuthi ipirates iphume namaphuzu ngisho elilodwa leli,” kusho umoloi.