Ezishaqisayo ngesonto lezidumo engcobo
Kubanjwe kulona abasolwa ngokubulala amaphoyisa
AKUKHO namunye namhlanje ozobeka umcondo wakhe enkonzweni, kumalungu ebandla lezimanga iseven Angel’s Ministries, engcobo, e-eastern Cape, lapho kutholakale khona inqwaba yabalisa abasolwa ngokuhlasela babulale amaphoyisa esiteshini sawo esikule ndawo.
Leli sonto livalwe thaqa njengoba sekuqubuke izinsolo zokuthi kugilwa kulo izimanga ezihambisana nemisebenzi kasathane yobumnyama.
Laba basolwa abatholakale becashe kulo kubikwa ukuthi bebehlome beyizingovolo, kanti batholwe yithimba lamaphoyisa ebelilandela umkhondo ngoLwesihlanu ebusuku.
Ngesikhathi kugasela amaphoyisa kule ndawo kusuke esinamathambo, atholana phezulu nabasolwa, kwaduma inganono, kwasala enkundleni abayi-7 (abasolwa).
Khona lapho kuboshwe abayi10. Abanye, okubikwe ukuthi abaziwa ukuthi bangaki, baphulukundlele bagcwala amathafa.
Kuyo le ndawo kutholakale nezibhamu ezinye zazo ebezintshontshwe emaphoyiseni ngesikhathi kuhlaselwa.
Ukubanjwa kwalaba basolwa kushayelwe ihlombe ngungqongqoshe wamaphoyisa kuzwelonke, umnu Fikile Mbalula, nokhomishana wamaphoyisa kuzwelonke, ugeneral Khehla Sitole.
Ukuhlasela esiteshini samaphoyisa ngolwesithathu kushaqise iningizimu Afrika yonkana, kwathukuthelisa umphakathi nezikhulu zamaphoyisa.
Ngemuva kwalesi sigameko sokuhlaselwa kwamaphoyisa esenzeke ngolwesithathu, kuhlanganiswe ithimba longqondongqondo bamaphoyisa, okuhlanganisa kulo awophiko lweSpecial Task Force (STF), National Intervention Unit (NIU), Tactical Response Team (TRT) namanye amathimba.
Ukuvalwa kwaleli bandla kuqinisekiswe ngokhulumela oklebe (Hawks), ubrigadier Hangwani Mulaudzi, oveze ukuthi abasolwa bebecashe kuleli sonto.
Ezinye zezakhamizi zakule ndawo ezikhulume nesiteshi sikamabonakude, INCA, ziveze ukukhathazeka ngaleli bandla okuthiwa kunezikhalo ngalo njengoba belenza izinto ezingaqondakali.
Phakathi kwezikhalo ngalo kubalwa ukugcinwa kwabantwana okumele engabe bafunda isikole kodwa abebengafundi, ngabantu asebekhulile abebekhala ngokudlelwa izimali zabo, abebehlala kulo.
Okuvelayo futhi wukuthi phambilini leli bandla like lavakashelwa ngabezenhlalakahle abafike baqoqa izingane ezincane ebezigcinwe yilona.