BANGQONGQISE IMPAHLA NGOMLILO ABAFUNDI ONGOYE
SIMANZONZO isimo esikhungweni semfundo ephakeme, inyuvesi yasezululand, kwadlangezwa, empangeni kulandela ukuthi izitshudeni zivuke umbhejazane, zacekela phansi impahla ngoLwesine.
Lokhu kuholele ekutheni kuboshwe izitshudeni ezingu-32. Laba bafundi bavele enkantolo yemantshi yasemthunzini ngoLwesihlanu kwathi abangu-13 badedelwa ngebheyili ka-r1000 isitshudeni ngasinye.
Izitshudeni zishise isitolo sezincwadi ngaphakathi zazitapela konke okuphakathi kanti namawindi emagunjini okufundelwa kuwona aphihlizwe ngamatshe.
Baphinde bashisa nesakhiwo senyuvesi esigcina amaphepha abalulekile nemoto yamaphoyisa bayokhele ngomlilo yangqongqa.
Okucasule abafundi wukuthi bathi kabakwazi ukugxila ezifundweni zabo ngoba inyuvesi ayibakhokhelile imali yokuthenga ukudla futhi kabasitholi isizathi salokhu.
Omunye wabafundi ocele ukuba lingadalulwa igama lakhe uthe side lesi sikhathi bethenjiswa ukuthi izongena imali kodwa inyuvesi ibabambisa amaqubu entenesha.
“Ungafunda kanjani ungadlile ngampela? Kunobugebengu obukhulu kabi lana ngaphakathi yingakho nje kuze kwenzeka into efana nalena. Ngeke sikwazi ukuqhubeka uma kuwukuthi azilungiswa izinkinga esibhekene nazo,” kusho umfundi.
Umnu Ndumiso Ntshangase, oyisekela likamengameli womkhandlu wabafundi kuyona le nyuvesi uthi kunabafundi abaningi ababoshwe kungafanele. Uthi kubukeka kusenzima ukuba isimo sibuyele kwesejwayelekile ngoba mkhulu umonakalo owenzekile.
“Laba abangaphumile siyathemba ukuthi udaba lwabo luzoxoxwa ngomsombuluko. Empeleni kukhona ababoshwe kungafanele.
"Abafundi badinwe kakhulu ngokunganikezwa imali okumele ngabe bayayithola,” kusho umnu Ntshangase.
Ngakolunye uhlangothi inyuvesi ithi uphiko lakwadlangezwa luzovalwa kuze kube bayaziswa abafundi.
Ithi izoqinisa kakhulu ukugadwa kwesikhungo yengeze onogada abasebenzisana namaphoyisa.
Iyalele abafundi ukuthi kabavumelekile ukusondela eduze kwesikhungo kuze kube bayaziswa. Uphiko olusebenzayo okwamanje ngoluserichards Bay lapho kusaqhubeka ukufunda nokufundisa. Okhulumela amaphoyisa Kwazulu-natal ucolonel Thulani Zwane uqiniseksiile ukuthi abasolwa bavelile enkantolo yemantshi yasemthunzini ngolwesihlanu. Uthi kulaba kukhona ababoshelwe ukugqekeza kanti abanye yicala lodlame emphakathini.
Uveze ukuthi laba abaphume ngebheyili bazophindela enkantolo ngomsombuluko kanti abanye bazovela phakathi nesonto.
mthobisis@ilanganews.co.za