EYESHASHALAZI EQONDENE NGQO NABAKU-MATRIC
UKHAYA NGEMA uthi kubalulekile ukuhambisana nezikhathi uma ufuna ukusiza abafundi bakamatikuletsheni baphase.
Lo mlingisi, ophinde abe ngusomahlaya, uthi izingane zamanje ziyixoxa kangcono into eziyibuke kumabonakude kunaleyo esuke ifundwe phansi.
“Kule midlalo esiyilingisayo kuba lula ukuba abafundi bakhumbule uma sebebhala ngoba ihambelana namahlaya futhi sisebenzisa nabantu akade befunda umatikuletsheni abaqonda kangcono ngezincwadi ezifundwayo,” kuchaza yena.
Phakathi kwezincwadi abazenza zibe yimidlalo yeshashalazi kubalwa ezithi: Impi Yabomdabu Isethunjini, Bengithi Lizokuna, The Village People, A chip of a Glass Ruby, Last Breath, My children My Africa.
Uthi ezinye zazo zisohlwini olusha lwezincwadi ezifundwa kulo nyaka.
Lo mshikashika uthi uqale ngowezi-2003 ehambela izifundazwe ezahlukene okubalwa kuzo i-eastern Cape, ifree State, i-eastern Cape, impumalanga nekwazulu Natal.
Uthi abafundi abasuke bezobuka le midlalo bathola ithuba lokubuza imibuzo makuphela umdlalo.
“Sisuke sisizana nothisha ukuphendula lapho bengazange baqonde khona. Ngaphezu kwalokho sisuke sihambisana nomuntu oyi- motivational speaker ukuze abafundi bagqugquzeleke,” kuchaza ukhaya.
Le midlalo izoqala mhlaka 8 kuya ku-12 kundasa ( March) nsukuzonke ekuseni. Ngeminye imininingwane xhumana nokhaya kule nombolo: 083 4757 032.
tzondi@ilanganews.co.za