INDLUNKULU KAZULU IKHETHA UKUYIZIBA INKULUMO KA-JULIUS MALEMA
INDLUNKULU kazulu ithi ngeke izihluphe ngokuphawula ngamazwi omholi we-economic Freedom Fighers (EFF), umnu Julius Malema, awasho ngolwesine esithangamini sabezindaba, lapho egxeke khona isilo samazulu, inkosi Goodwill Zwelithini, esisola ngokufutha uphondo lwempi ngendaba yomhlaba.
Umnu Malema uthe akumele ikhulunywe ngendlela yokwesabisa nangendlela yempi le ndaba yokubuyiselwa komhlaba ngaphandle kwesinxaphezelo.
Uthe kufanele kube nenkulumo mpikiswano evulelekile ngalolu daba - ngisho ngabe kufanele naso isilo siphikiswe kumele kube njalo ngaphandle kokwesaba.
Umnu Malema uze wathi yena akesabi muntu ngaphandle kukaNkulunkulu.
Uqhube wathi kumele sihlonishwe isilo kepha hhayi ukuba sesatshwe.
Sesizwakale kaningana isilo sivutha ngendaba yombiko osususe umsindo okhiphe isincomo sokuba umthetho olawula ukusebenza kwengonyama Trust wesulwe noma ubuyekezwe.
Ingonyaka Trust yiyo elawula umhlaba ongaphansi kwamakhosi Kwazulu-natal, kanti isilo sithi kumele kuliwe nokuhlakazwa kwengonyama Trust nokuthathwa ko-mhlaba ongaphansi kwayo.
Mayelana nenkulumo kamnu Malema yakamuva, okhulumela isilo, umntwana uthulani, uthe: “Siyibonile le nkulumo kamnu Malema. Inkosi yamazulu ayihambe iphendula noma ngubani nje osho into ayithandayo. Umnu Malema uyakwazi lapha endlunkulu, uma kukhona afisa ukukwedlulisa esilweni bekumele eze hhayi ukuvele agqamuke nje. Sizowuhlaba inhlali ngabomu.” knowledge.simelane@ilanganews. co.za