Ugwala ucacisa ngokuhlaselwa kwakhe
Uvakashelwe yizikhulu zikahulumeni esibhedlela
NAKUBA isimo esimehlele sinyantisa igazi kodwa ukhombisa ukuba nesibindi esiyisimanga umsubathi, umtshuzi ophinde abe ngumshovi wamabhiyisikili, umhlengi Gwala.
Isigameko sokuhlaselwa kwakhe esenzeke ngolwesibili ezintathakusa, lapho ehlangane nabantu abangaziwa ezilolonga, bambamba bamsaha umlenze, sithinte abantu abaningi emhlabeni jikele.
Izolo ILANGA Langesonto lishicilele isibalelwa ku-r648 054 imali enikelwe ngabantu ukuze asizakale, athole ukwelashwa okusezingeni eliphezulu. Njengamanje ulaliswe esibhedlela esizimele ist Augustine, khona ethekwini.
Ekhuluma kwi- video eshicilelwe yi-independent Online, umhlengi uthi laba bantu abamhlasele bebekhuluma ulimi abengaluzwa.
Uthi bambambile omunye wabo wabe esemsaha, kwathi esephakathi wayeka wayobheka into ethile.
“Angazi ukuthi ubeyobhekani. Ubuye lapho wathi kwabanye ‘asambeni’, base bebaleka. Ngizamile ukufonela amaphoyisa, ngafonela usandile wangaphendula, namaphoyisa angaphendula,” kulanda yena.
Uthi ube esezama ukugaqa ngolunye unyawo aphumele emgwaqweni. Emva kwesikhashana esincane uthi kuqhamuke onogada bakwafidelity, wabanxusa ukuba bamyise esibhedlela, base bemphuthumisa esibhedlela inkosi Albert Luthuli.
Ngolwesihlanu uvakashelwe ngungqongqoshe wezemidlalo kuzwelonke unkk Tokozile Xasa nongqongqoshe wezokuthuthukiswa komphakathi KwazuluNatal, unkk Weziwe Thusi.
Yize noma odokotela bakhe bevezile ukuthi okwamanje kusenzima ukuqinisekisa ukuthi usazokwazi yini ukuphinda angenele imiqhudelwano abeyingenela emhlabeni, kodwa bakucacisile ukuthi leso sinqumo bangaze bakwazi ukusithatha ngemuva kweminyaka emibili.
Unkk Xasa ukuchaze njengobulwane lokhu okwenziwe yizigi- lamkhuba ezihlasele umhlengi.
Ngokusho kukadokotela wakhe, u-o’sharran Singh oyi-plastic Surgeon, izigebengu ziqale zasaha unyawo kodwa bangaphumelela, base bemsaha esithweni kwanqamuka imisipha, kwathinteka nethambo.
“Ulimale kanzima, kusale kancane ukuba unyawo lunqamuke ngoba isaha likwazile ukungena indawo engama-80%. Nakhona ukuthi unyawo kalunqamukanga yingoba belibuthuntu isaha,” kusho udokotela.
Udkt Singh uqhube wathi abakhathazekile kakhulu ngethambo lonyawo lwakhe ngoba lizohluma lihlangane kodwa bakhathazekile kakhulu ngemithambo yona enqamukile.
Umhlengi uthe unethemba lokuthi uzolulama kodwa wathi kuyamkhathaza okushiwo ngodokotela ukuthi kuzothatha isikhathi eside ukuba alulame.
“Nginethemba ukuthi ngizolulama noma-ke ngisakhungathekile ukuthi ngabe bebeqhamukaphi laba bantu abebephethe isaha ngalesiya sikhathi,” kusho yena.
Unkk Xasa uthe unethemba lokuthi amaphoyisa azokwazi ukubopha lezi zigilamkhuba ezikhombise ubulwane.
“Lokhu kukwenza uzibuze ukuthi sesiphila kanjani singabantu. Kukhona omunye umuntu ongakwazi ukusebenzisa isaha komunye ngesihluku esingaka.
Lesi senzo sikhombisa ubulwane obuyisimanga kanti sinethemba lokuthi amaphoyisa azokwenza konke okusemandleni ukubopha izigila mkhuba,” kusho yena.
Amaphoyisa aqinisekile ukuthi kuvulwe icala lokuzama ukubulala kodwa bekungakaboshwa muntu.
* Bheka ekhasini 18