UBEYISISHOSHA U-KIM OSEPHENDUKE USAZIWAYO
UZALWE eyisishosha uthembinkosi Mngomezulu (29), osedume ezinkundleni zokuxhumana nasezindaweni zenjabulo ngegama likakim, ongakwazi ukukhuluma kahle.
Lokhu kudalulwe nguyise umnu John Thandabantu Mngomezulu ekhuluma NELANGA Langesonto.
Kuyimanje ukim ulandelwa ngabangaphezulu kwezinkulungwane ezingama-25 enkundleni yokuxhumana yabasezintweni u-instagram. Udume ngokuthanda ukuqabula isifazane nangokubelesela ngokuthi “I mev you” eqonde ukuthi “I love you”.
Uyise uthi nakuba ukim ekhule engumuntu ozikhonzele ukudansa, kodwa ubezalwe eyisishosha, efana nomuntu ongenawo namathambo.
“Ngenza yonke imizamo, sihamba kodokotela kodwa kungalungi kahle. Kwaze kwathi kamuva ngathi unina makamuyise ebuhleni kusahleli unyangayezulu (Amos Khula Shembe) esihlalweni sokuhola amanazaretha.
"Kwaphela izinsuku ezimbili kuphela wabe esekwazi ukuzihambela, kwagcina kusale ukukhuluma kahle kuphela,” kuchaza uyise.
Ngale kokungakhulumi into eyomile, ukim unokukhubazeka ngokwengqondo, okuyisifo esibizwa nge- down syndrome ngesingisi. Uyise uthi nakuba uyakwazi ukukhuluma namuhla, ubonga unyangayezulu ngokumnika amathambo njengoba esekwazi ukudansa nokucula njengoba kuneqembu acula nalo i-10 Blocks nomfowabo upapa Samkelo Mngomezulu.
Uthi ukudansa kwakhe elokishini enanda kumveze kumnu Nhlanhla Mthembu, owaziwa kangcono ngelikaMabhodisa.
“Umthembu umthathe wamfaka kulayini okuyiwo ngoba embona ukuthi ungumuntu onjani, ozithandela ukudansa,” kuqhuba uyise.
Uthi nakuba engenalwazi oluphelele ngendaba yemali etholwa ngukim lapho esuke eqashwe khona, kodwa useke afike nemali ekhaya. Uthi basanxusa ukuba besekwe nasemisakazweni ukuze ube yimpumelelo umsebenzi wendodana yakhe. Ekhuluma naleli phephandaba phambilini umabhodisa uthe, imadlana abebeyithola bamlekelela ngayo ukumthengela izimpahla ukuze abukeke bese enye beyiyisa kubazali bakhe. Ngempelasonto edlule ubemenzele umcimbi wokubungaza usuku lokuzalwa lwakhe (ukim) kuleli lokishi, esbu’s Lounge. Uthi nawo lo mcimbi ubemenzele ngokuphuma ephaketheni lakhe kanti uyafisa ngelinye ilanga bavele ngaphambili abangamlekelela ekwesekeni kwakhe ukim.
zowakha@ilanganews.co.za