AMANAZARETHA ASAZOLINDA NGESINQUMO SENKANTOLO
LISAZOKE lilinde isikhashana ibandla lamanazaretha ezinhlangothini zombili - olwasebutheni nolwasethembezinhle, mayelana nesinqumo samajaji amathathu enkantolo enkulu yasemgungundlovu ngodaba lombango ophakathi kwalezi zinhlangothi.
Uhlangothi lwasebuhleni luholwa yinkosi umduduzi “Nyazilwezulu” Shembe, kuthi inkosi uphinda “Inkanyeziyesithathu” Shembe ihole olwasethembezinhle.
Ngasekupheleni konyaka odlule amajaji amathathu, ujustice Mjabuliseni Madondo, oyiphini likamengameli wamajaji Kwazulu-natal, elekelelana nejaji umnu Bhekisisa Mnguni nejaji Poyo Dlwati, basigodlile isinqumo sabo emuva kokulalela izethulo zommeli wonyazi u-advocate Rajesh Choudree nowenkanyezi u-advocate Archie Findlay.
Ngokusho kommeli owajuba u-advocate Findlay, umnu Trevor Nkosi bebenethemba lokuthi isinqumo singase siphume ngenyanga eyedlule, okungenzekanga.
ILANGA Langesonto lishayele ihhovisi lejaji umadondo emgungundlovu ucingo lathola ocele kuba angacashunwa ngenxa yokuthi akagunyaziwe ukukhuluma, wathi ngolwazi analo ijaji umadondo seliqedile, kepha lilasinde ozakwabo abasaxinwe ngeminye imisebenzi.
“Elinye lamajaji elisingethe lolu daba nojaji Madondo liseGauteng ngomsebenzi, uma libuya nje wethembise ukuthi uzokwazisa abameli ngosuku lokukhishwa kwesinqumo,” kusho lesi sisebenzi.
Kuzokhumbuleka ukuthi ngonyaka wezi-2016 ijaji u-achmat Jappie likhiphe isinqumo esivu- na ongasekho inkosi uvela Muhle “Imisebeyelanga” Shembe esithi nguye ongumholi owaqokwa ngencwadi yinkosi uvimbeni “Thingolwenkosazane” Shembe ukuba ahole ibandla lasebuhleni, kepha unyazilwezulu lasiphikisa leso sinqumo lathi kuningi okungabhekekanga, lwacela ukuba kuyiwe enkantolo yokwedlulisa amacala.
Lawa majaji amathathu yiwo asezosho ukuthi ngabe ijaji Jappie washaya eceleni yini noma wakhipha isinqumo esifanele.