UPHIKA EYOKUNGEZWANI NO-ZAKES
UYIHLABA uyayihlikiza umuseeq IQ ( osesithombeni) eyezinkulumo esezisabalele okomlilo wequbula zokungezwani kwakhe nozakes Bantwini.
Ekhuluma NELANGA LangeSonto , umusseq IQ, uthi ziyamkhathaza futhi zimphatha kabi lezi zinkulumo esezibhebhethekile. Uthi sekukaningi ezizwa kodwa engekho ofisa ukusondela eduze ambuze ngobudlewane bakhe nozakes.
Uthi yena nozakes bafana nabandawonye ngoba omunye uyaziwa kubo komunye futhi ubungani babo busukela besafunda isikole.
Uthi bakhule bejwayele ukuchitha isikhathi esiningi ndawonye, okuthe uma abantu bengasakuboni lokho kwenzeka base bezidwebela izithombe zokuthi kabasezwani.
“Akukho ukungezwani phakathi kwami nozakes kodwa ukukhula kuphela njengoba kwenzeka nakunoma ngubani. Impilo esiyiphilayo yehlukene kakhulu manje kodwa lokho kakusho ukuthi kasisezwani,” kuqhuba umuseeq IQ.
Uthi ngesikhathi uzakes eqala ephumelela emculweni bese kunzima ukuba bachithe isikhathi esiningi ndawonye ngoba umculo ubumhambisa uzakes kanti naye ubenomsebenzi aqashwe kuwo ngokugcwele.
Uqhube wathi nempilo abayiphilayo njengamanje yehlukene kakhulu njengoba bobabili bematasa ngomculo, ngaphezu kwalokho uzakes useshadelwe.
“Ekugcineni singabantu abehlukene nozakes, abantu kumele baqonde ukuthi umuntu wenza into azinqumele yona empilweni. Uma ungumuntu kumele umnga- ni wakho umvumele ukuba aphumelele kwakwenzayo. Ukungabonakali kwethu emphakathini akusho ukuthi kasisezwani, siyezwana,” kuqhuba umuseeq IQ athi kwalona leli gama walethwa nguzakes.
Uthi kuyenzeka kube khona ukungezwani phakathi kwabangani kube nokuphikisana kodwa kubuye kudlule futhi.
“Kuyenzeka uzakes ngimyale ngenye indlela kodwa uthole ukuthi uzokwenza ngeyakhe indlela - lokho akusho ukuthi kasizwani,” kuphetha yena.
Abazishwashwathayo bathi lezi zihlabani zibanga ukuthi uzakes akazange ambalule umuseeq IQ kwezinye zezingoma amsize kuzona. Umuseeq IQ udalule ukuthi kunengoma yakhe entsha ethi: ‘ When She Comes Over’ ebhalwe yadidiyelwa nguZakes.