Kuvuka iminjunju ngokufa kukaflabba
Ukhunjulwe ngengoma ngozakwabo beskwatta Camp
UKHUNJULWE ngengoma enemiyalezo yozakwabo umculi wehiphop odlule kabuhlungu emhlabeni eminyakeni emithathu edlule ziyi9 kundasa (March), unkululeko Habedi ( osesithombeni) owayedume ngelikaflabba eqenjini iskwatta Kamp.
Leli qembu lakhiwe ngu-infa, Nish, Shugasmakx, Nemza, Slikour, Bozza naye uflabba kanti bebejwayele ukumema intokazi urelo.
Ukubulawa kwalo mculi (obeneminyaka engama-37 ngaleso sikhathi) yintokazi abethandana nayo usindisiwe Manqele, kwathusa abaningi njengoba wayesanda kugqama futhi emuva kokuba leli qembu bese linyamalale isikhathi eside.
Wabulawa kusadlule izinsukwana ezimbalwa evele ohlelweni ilive Amp KUSABC 1 ecula ingoma kavetkuk vs Mahoota ayicula nocassper Nyovest no-ab Crazy ethi Jova.
Sekuwumlando ukuthi umbulali ugwetshwe iminyaka eyi-12 yijaji usolly Sithole enkantolo enkulu ebihleli enkantolo yemantshi epalm Ridge ngozibandlela (December) wezi-2015.
Ngolwesihlanu leli qembu beligcwele e-studio emetro FM kusukela ngehora lesihlanu ekuseni kwaze kwashaya ele-8 ohlelweni lukathato Sikwane odume ngelikadj Fresh kukhunjulwa lolu suku lwezidubedube.
Le ngoma akhunjulwa ngayo ethi “There You Go” inezinto abamkhumbula ngazo ozakwabo ezisezinhliziyweni zabo nokuyizenzo zakhe.
Urelo uthi wayekhihla isililo ngesikhathi ebhala izinhlamvu zakhe kule ngoma edidiyelwe nguyuvir Pillay wasethekwini nowaziwa kangcono ngelikaSketchy Bongo osedidiyelele inqwaba yabaculi abadumile izingoma.
Le ngoma isiyatholakala ezitolo ezidayisa umculo kwi-internet nakwi-website kaslikour ekhonzwe kakhulu ngabalandeli be-hip hop njengoba ihlale ibalethela izindaba nomculo wakamuva walolu hlobo.
Izoba yingxenye yeqoqo lezingoma eziyisithupha abazozikhipha ezintsha. Okuqaphelekile wukuthi u-infa ubengekho kulesi sikhumbuzo. Ozakwabo bathe wanquma ukulishiya iqembu.
Ekhuluma NELANGA Langesonto uslikour uthe okwamanje yile ngoma esatholakala kodwa zonke ezinye zizobe sezitholakala ekupheleni kukambasa (April). Ebuzwa ngendaba kasindisiwe nobudlelwano nomndeni kaflabba uthi kakukaze kubonwane naye ubuso nobuso.
“Nomama ugcine ethi akakakulungeli ukumbona, hhayi ngoba emdinelwe kodwa umphefumulo kawukamvumeli kanti nathi besingakaze simbone,” usho kanje.
Maduze nje kuzotholakala NEDVD ekhombisa obekwenzeka ngesikhathi kuqoshwa le ngoma nengxoxo nonina kaflabba.
Uthe u-infa bahlele ukuhlangana naye kule mpelasonto esiyiphethayo nokuyikho okuzonquma ukuthi uyangena na kulezi ezinye izingoma noma ligqashuka ngempela igoda.
zowakha@ilanganews.co.za