Isililo kushona obewukhokhovula lwenyanga, uzihlahlazemithi
ABAZALI bezingane bafe olwembiza ngokudlula emhlabeni kokhokhovu lwenyanga ebidume ngokwelapha ikhiphe inyoni kubantwana kuleli, umnu Mkhuluwe Protus Cele (83), obedume ngelikazihlahlazemithi ezigulini zakhe.
Uzihlahlazemithi ushonele esibhedlela ist Augustine's ethekwini ngolwesithathu kusihlwa ngezithuba zehora lesi-7 emuva kokuxinwa yisifo esiphathelene nenhliziyo. Lezi zindaba zibikelwe ILANGA Langesonto yindodana yakhe, umnu Nkuzi Cele, osekunguyena vele ophethe isikhwama sikayise.
Leli phephandaba lifike emzini wakhe engonyameni eningizimu yetheku, ngasemlazi ngolwesine kukhona izingane zakhe namalungu omndeni, bebuthene bebalisa ngokudlula kwakhe. Nokho kukhona abebethi uphumule ezinhlungwini ebezimphethe, abanye bengayemukeli eyokuhamba kwakhe.
Uzihlahlazemithi ubenekhemesi lakhe elidumile elisekhona namanje kwa-j emlazi, eseliphethwe ngunkunzi.
Ebuzwa ukuthi ngabe bazokwenzenjani abazali bezingane abebethembele kuye ekuchathweni kwezingane zikhishwa yinyoni, unkunzi uthe: “Noma kubuhlungu ukushiywa ngubaba kodwa okuhle wukuthi ubesesifundisile umsebenzi kangangoba ukukhishwa kwenyoni ezinganeni bese kuvele kwenziwa ngugogo umakubheka esaphila ubaba.
"Ezinye izifo zelashwa yimina nomfowethu uthobani. Umsebenzi usazoqhubeka.” Uzihlahlazemithi nguyena owaba ngumsunguli wenhlangano yezinyanga eyayibizwa ngenyangas National Association, ehlangene nongasekho, usamuel Bhezizwe Jamile, umhlahlo Mlotshwa.
Ubesesenhlanganweni yabelaphi bendabuko ebizwa ngeCouncil of National Health Practitioners, kanti ubesevule isikole esifundisa izinyanga ukwelapha ngamakhambi khona engonyameni. Ubehlonishwa kakhulu ngabezemvelo kuleli ngokuba ngumongi wemvelo njengoba etshale ihlathi lapho emba khona izimpande zokwelapha.
Uzofihlwa emathuneni asekhaya ngomgqibelo mhla zili18 kwephezulu emuva kwenkonzo ekhaya ezoqala ngehora le-10. Umkakhe, unkk Ganeni Mahlophe Cele, ushone kuqala. Ubebusiswe ngezingane ezili-19 kepha ezinye sezendela koyisemkhulu.
Umnu Sazi Mhlongo, inyanga eyaziwayo kuleli, nesebenze nomnu Cele kakhulu uthe: "Sife olwembiza ngokudlula kukasolwazi Cele obenguthisha efundisa izinyanga ukusuka nokuhlala indlela ehlanzekile yokwelapha abantu.
"Useze wahamba emhlabeni engenalo iphunga lezenzo ezimbi ezifana nokuqolwa kwabantu, ukusebenzisa izicubu zabo njalo njalo. Ubemnene efuna izinto zenziwe ngeqiniso. Siyohlala simkhumbula njalo," kusho umnu Mhlongo.
Esigamekweni esenzeka phambi kwentatheli eloba lolu daba eminyakeni yowe-1980, umnu Cele engumgcinimafa wenhlangano inyangasa National Association kwake kwagasela umnu Jamile emzini wakhe ezomephuca amabhuku emehlisa esikhundleni.
Wakhombisa ukuzithoba okuyisimanga wamnikeza wonke amabhuku maqede wabonga behlukana kanjalo. Lolo daba lwalotshwa lwaphuma kulo leli likamafukuzela.